މަހްލޫފަށް ދައުވާ އުފުލީ ހިތުން ރައްޔިތުންގެ ލޮލުގައި އަނދުން އަޅުވަން ކަމަށް ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް ކުރެއްވި ޓުވީޓެއްގައި ވިދާޅުވީ، ދައުލަތުން ޔޫތު މިނިސްޓަރ މަހުލޫގެ މައްޗަށް ދައުވާ އުފުލީ ހިތުން ރައްޔިތުންގެ ލޮލުގައި އަނދުން އަޅުވައި މާ އިންސާފުވެރި ބައެއްކަން ދައްކަން ކަމަށެވެ. އަޑީގައި އޮތީ ކުރީގެ ރައީސް ޔާމީނަށް އަނިޔާ ދިނުމުގެ ނުބައި ވިސްނުން އެކަނި ކަމަށާއި ރައީސް ޔާމީނަށް އިންސާފު ލިބުމަށް އެދެނީ ޕީޕީއެމް ޕީއެންސީ އެކަނި ނޫން ކަމާއި މުޅި ގައުމު ކަން ދަންނަން ޖެހޭ ކަމަށް ޝިޔާމް ވިދާޅުވިއެވެ.
އެމްއެމްޕީއާރުސީގެ ހިޔާނާތުގެ މައްސަލައިގާ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަހްމަދު މަޚްލޫފުގެ މައްޗަށް ދަޢުވާކުރުމަށް ކްރިމިނަލް ކޯޓަށް ޕީޖީން ހުށަހެޅީ އިއްޔެ އެވެ. މިނިސްޓަރ މަހްލޫފުގެ މައްޗަށް ދައުވާކޮށްފައިވަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން ލިމިޓެޑްގެ ޚިޔާނާތުގެ މައްސަލައިގެތެރޭގައި ހިންގާފައިވާ ކޮރަޕްޝަނާއި ޚިޔާނާތާއި މަނީ ލޯންޑްރިންގގެ މައްސަތައް ބެލުމަށް ފުލުހުންނާއި، އެސެޓް ރިކަވަރީ ކޮމިޝަނާއި އޭސީސީން ކުރިއަށް ގެންދާ ޖޮއިންޓް އިންވެސްޓިގޭޝަންއިން ހިންގި ތަޙުޤީޤުގައި އެސް.އޯ.އެފް ޕްރައިވެޓް ލިމިޓެޑުން އޭނާއަށް ފައިސާދީފައިވާކަމަށް ތުހުމަތުކުރެވުނު މައްސަލައިގައެވެ.
