ދުނިޔޭގެ ގައުމުތަކުގައި ފެތުރޭ ކޮވިޑްގެ އައު ވޭރިއަންޓުތައްވެސް ރާއްޖެ އަތުވެދާނެ ކަމަށާއި ނަމަވެސް ރައްކާތެރިކަން ހިޔާރުކޮށްފިނަމަ މުޖުތަމައުގައި ބަލި ފެތުރޭ މިންވަރު ކުޑަކުރެވޭނެ ކަމަށް އެޗްޕީއޭގެ މެޑިކަލް އޮފިސަރ ޑރ ނަޒުލާ ރަފީގު ވިދާޅުވެއްޖެއެވެ.
ދެކުނު އެފުރިކާއިން އަލަށް ފެނިފައިވާ ކޮވިޑް19ގެ އައު ވޭރިއަންޓް އޮމިކްރޮން ހަލުވި ކަމާއެކު ދުނިޔޭގެ އެކި ގައުމުތަކުގައި ފެތުރެމުންދާތީ މިކަމާ ގުޅޭގޮތުން މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޑރ ނަޒުލާ ވިދާޅުވީ، ގެސްޓުހައުސް ހުންނަ ގިނަ ރަށްތަކުގައި ވަރަށް މަދުން ނޫނީ މާސްކު އަޅައިގެން އުޅޭ މީހުން ނުފެންނަ ކަމަށާއި ބަލި ފެތުރުން ކޮންޓްރޯލް ކުރުމަށް އަދިވެސް އެޅިދާނެ އެންމެ މުހިންމު ފިޔަވަޅަކީ މާސްކު އެޅުން ކަމަށެވެ. އެހެންކަމުން ރާއްޖެއިން ބޭރަށް ދަތުރު ކުރާ ފަރާތްތަކުންވެސް އެގައުމުތަކުގައި ބަލި ނޫޅޭ ނަމަވެސް ބޭރުތެރޭގައި އުޅޭ އިރުގައާ ގިނަ މީހުން އެކުގައި ދާ ތަންތަނަށް ދާއިރު އަބަދުވެސް ރައްކާތެރިކަމުގެ ފިޔަވަޅުތައް އެޅުމަށް އިސްކަންދިނުން މުހިންމު ކަމަށް ޑރ ނަޒުލާ ވިދާޅުވިއެވެ.
މީގެ އިތުރުން މިހާރުވެސް ވެލާނާ އިންޓަރނޭޝަނަލް އެއަރޕޯޓުގައި ރައްކާތެރިކަމުގެ އިތުރު ހަރުދަނާ ފިޔަވަޅުތައް އެޅުމަށް ދަނީ މަސައްކަތް ކުރެވެމުން ކަމަށްވެސް ޑރ ނަޒުލާ ވިދާޅުވިއެވެ.
އެޗްޕީއޭގެ މެޑިކަލް އޮފިސަރ އިތުރަށް ވިދާޅުވީ، ކުރިން ކޮވިޑް19 އަށް ޕޮޒިޓިވްވެ ރަނގަޅުވެފައިވާ މީހުންނަށްވެސް އޮމިކްރޮން ވޭރިއަންޓް ޖެހުމުގެ ފުރުސަތު ބޮޑު ކަމަށެވެ. އަދި ޓުއަރިސްޓުންނަށް ހިދުމަތްދޭ ހުރިހާ ފަރާތްތަކުންވެސް ގައިޑްލައިންތަކުގައި ހުންނަ ކަންކަމަށް ސަމާލުކަން ދޭން ޖެހޭނެ ކަމަށާއި ބައެއް ފަހަރު ތަނުގެ އޮޕަރޭޝަންސް ހުއްޓިދާނެތީ ރަނގަޅު ނޫން މައުލޫމާތު ބައެއް ތަންތަނުން ދޭ ކަމަށް ނަޒުލާ ވިދާޅުވިއެވެ.
