ކުރީގެ ރައީސް ޔާމީންގެ ޕާސްޕޯޓް ހިފެހެއްޓުމުގެ އަމުރަކަށް އެދުނީ ކޮރަޕްޝަންގެ މައްސަލަތަކުގައި އަމަލުކުރާ އުސޫލުން ކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެފިއެވެ.
ރައީސް ޔާމީންގެ ފުރުން މަނާކުރުމުގެ އަމުރެއް ނެރެދޭން އެދުނީ ކީއްވެތީ ސުވާލު ކުރުމުން ޕީޖީން ބުނީ، ކޮރަޕްޝަންގެ ބޮޑެތި މައްސަލަތަކުގައި ދަޢުވާލިބޭ އަދި ތުހުމަތުކުރެވޭ މީހުންގެ ޕާސްޕޯޓް ހިފެހެއްޓުމަކީ އެ އޮފީހުން ޢަމަލުކުރާ އެސްއޯޕީގައި އޮންނަ ކަމެއް ކަމަށެވެ.
އަދި މިމައްސަލައިގައި ތުހުމަތުކުރެވޭ އިތުރުމީހުންގެ ޕާސްޕޯޓްވެސް ވަނީ ހިފެހެއްޓިފައި ކަމަށާއި ޕާސްޕޯޓް ހިފެހެއްޓުމުގެ އަމުރަކަށް އެދުމަށް ފުލުހުންނަށް ލަފާދީފައިވާނީ، އެފަދަ އަމުރަކަށް އެދެވޭނީ ގާނޫނުތަންފީޛްކުރާ އިދާރާތަކަށްކަމަށް ޖިނާއީ އިޖުރާއަތުގެ ގާނޫނުގައި ބަޔާންކޮށްފައި އޮންނާތީ ކަމަށްވެސް ޕީޖީން ވަނީ ބުނެފައެވެ.
ޕީޖީ އޮފީހުން ބުނީ ޕާސްޕޯޓް ހިފެހެއްޓުމުގެ އަމުރަކަށް އެދި ކޯޓަށް ހުށަހެޅުމަށް ފުލުހުންނަށް ލަފާދީފައިވާނީ އިއްޔެގެ ވަގުތެއްގައި ކަމަށެވެ. ރައީސް ޔާމީން ރާއްޖެއިން ފުރުން މަނާކޮށްދިނުމުގެ އަމުރަކަށް ޕީޖީން އެދުނު އިރު އެމަނިކުފާނުގެ މައްޗަށް ކުރިމިނަލް ކޯޓުން އިއްވާފައިވާ ފަސް އަހަރު ދުވަހުގެ ޖަލު ހުކުމް ބާތިލް ކުރުމަށް ސުޕްރީމް ކޯޓުން ވަނީ އިއްޔެ ނިންމާފައެވެ.
އެމަނިކުފާނަށް ކުރި މިހުކުމް ބާތިލް ކޮށްފައި މިވަނީ 732 ދުވަސް ފަހުންނެވެ.
