އަރަބިއްޔާ ސުކޫލްގެ ދަރިވަރުންގެ ކިޔެވުން ވަގުތީގޮތުން އިއްޒުއްދީން ސުކޫލަށް ބަދަލުކުރަން ނިންމައިފައިވާ ކަމަށް މިނިސްޓްރީ އޮފް އެޑިއުކޭޝަނުން ހާމަކޮށްފިއެވެ.
އެޑިއުކޭޝަން މިނިސްޓްރީން ނެރުނު ބަޔާނެއްގައި ބުނެފައިވަނީ، 700 އަށްވުރެ ގިނަ ދަރިވަރުންގެ ކިޔެވުން މެދު ނުކެނޑި ކުރިއަށް ގެންދެވޭނީ ސުކޫލެއް ހިންގުމަށް އިމާރާތްކޮށްފައިހުރި ތަނެއްގައި ކަމަށާއި މިފަދަ އިމާރާތަކީ ކިޔަވައިދިނުމަށް ހާއްސަކޮށް ފަރުމާ ކުރެވި އެކަމަށް ބޭނުންވާ ވަސީލަތްތައް ގާއިމުކުރެވިފައިވާ ތަނަކަށް ވާންޖެހޭ ކަމަށް އެ ބަޔާނުގައި ބުނެފައިވެއެވެ. އެގޮތުން މިކަންތައްތަކަށް ރިއާޔަތްކޮށް އަރަބިއްޔާ ސުކޫލްގެ ދަރިވަރުންގެ ކިޔެވުން ވަގުތީގޮތުން އިއްޒުއްދީން ސުކޫލަށް ބަދަލު ކުރުމާއެކު، މިހާރު ހުޅުމާލޭގައި އިމާރާތް ކުރަމުންދާ ސުކޫލްތަކުގެ ތެރެއިން، އެއް ސުކޫލް އަރަބިއްޔާ އަށް ހާއްސަ ކުރުމަށް ވެސް ވަނީ ނިންމާފައި ކަމަށް ބުނެފައިވެއެވެ.
މީގެ އިތުރުންވެސް ސްޓްރަކްޗަރަލް އެސެސްމަންޓް ނިމުމުން، އެ އެސެސްމަންޓްގެ ރިކޮމެންޑޭޝަނާއި އެއްގޮތަށް، އެ އިމާރާތަށް ދިމާވެފައިވާ މައްސަލަތައް ހައްލު ކުރާނެ ކަމަށްވެސް އެ ބަޔާނުގައި ބުނެފައިވެއެވެ. އަދި މިހާރުގެ އަރަބިއްޔާ ސުކޫލްގެ އިމާރާތް އަބަދުވެސް ހުންނާނީ އަރަބިއްޔާއަށް ހާއްސަ ކުރެވިފައި ކަމަށްވެސް ބުނެފައިވެއެވެ.
މިނިސްޓްރީން ބުނެފައިވަނީ އަލް މަދަރުސަތުލް އަރަބިއްޔަތުލް އިސްލާމިއްޔާ އަކީ ސަރުކާރުން ހިންގާ 213 ސުކޫލުތެރޭގައި ހިމެނޭ ހާއްސަ ސިފަތަކެއް އެކުލެވިގެންވާ އަދި އެ ސުކޫލަކަށް ހާއްސަ ސަމާލުކަމެއް ދެވިގެން ހިންގާ ސުކޫލެއް ކަމަށާއި އެ ސުކޫލަކީ ދިވެހިރާއްޖޭގެ ތައުލީމު ފޯރުކޮށްދިނުމުގައި އިސްލާމީ ވަހުދަތު ރަމުޒުކޮށްދޭ އެންމެ މުހިންމު އެއް މުއައްސަސާ ކަމަށެވެ. އަރަބިއްޔާ ސުކޫލްގައި ފޯރުކޮށްދޭ ތައުލީމީ މަންހަޖާއި ދަރިވަރުން ހަދާ އިމްތިހާނުތަކަކީވެސް މިސްރުގެ އަލް އަޒުހަރު ޔުނިވަރސިޓީ ގަބޫލުކުރާ އިމްތިހާނެއް ކަންވެސް ވަނީ ފާހަގަކޮށްފައެވެ.
