ހުސްވެފައިވާ ކޮމަންޑޫ ދާއިރާ ގޮނޑިއަށް މެމްބަރަކު ހޮވުމަށް ބާއްވާ ކޮމަންޑޫ ދާއިރާގެ ބައި-އިލެކްޝަންގެ ޕްރައިމަރީގައި ވާދަކުރުމުގެ ފުރުސަތު އެމްޑީޕީން ހުޅުވާލައިފިއެވެ.
އެގޮތުން އެޕާޓީން ބުނެފައިވަނީ ށ ކޮމަންޑޫ ދާއިރާގެ ބައި އިލެކްޝަންގެ ޕްރައިމަރީ މިމަހުގެ 27 ވާ ހޯމަ ދުވަހު ބޭއްވުމަށް އެޕާޓީން ނިންމާފައިވާކަމަށެވެ.
މި ޕްރައިމަރީ އޮންނާނީ އެދުވަހުގެ ހެނދުނު 10 އިން ހަވީރު 5 އަށް އެދާއިރާގެ ރަށްރަށުގައާއި މާލޭގެ ހަރުގޭގައިކަމަށް އެމްޑީޕީން ބުނެފައިވެއެވެ. އެމްޑީޕީގެ ޕްރައިމަރީގައި ވާދަކުރަން ބޭނުންވާ ފަރާތްތަކުން މިމަހުގެ 21 ވާ އަންގާރަ ދުވަހުގެ 16:00 ކުރިން އެމްޑީޕީގެ ސެކްރެޓޭރިއަޓަށް އީމެއިލް ކުރެއްވުމުން ފޯމް ބަލައިގަންނާނެކަމަށް އެޕާޓީން ވަނީ ހާމަކޮށްފައެވެ. 19 ވަނަ ރައްޔިތުންގެ މަޖިލީހުގެ ށ ކޮމަންޑޫ ދާއިރާގެ ގޮނޑި ހުސްވެފައިވަނީ އެދާއިރާގެ މެންބަރު ހުސައިން ވަހީދު ނިޔާވުމާއި ގުޅިގެންނެވެ.
ކޮމަންޑޫ ދާއިރާގެ ބައި އިލެކްޝަން އަންނަ އަހަރުގެ ފެބްރުއަރީމަހުގެ ފަސްވަނަ ދުވަހު ބޭއްވުމަށް ނިންމާފައިވާ ކަމަށް އިލެކްޝަންސް ކޮމިޝަނުން ވަނީ ހާމަކޮށްފައެވެ.
