އިންޑިއާގެ މިލިޓަރީ ސިފައިން ރާއްޖޭގައި ތިބުމަށް ތާއީދުކުރުމަކީ ގައުމަށް ޣައްދާރުވުން ކަމަށް އިދިކޮޅު ޕީޕީއެމުން ބުނެފިއެވެ.
އިދިކޮޅުން ކުރިއަށްގެންދާ "އިންޑިއާ އައުޓް" ހަރަކާތަކީ ޖަރީމާއެއް ކަމަށް މޯލްޑިވްސް ނެޝަނަލް ޕާޓީގެ ރައީސް މުހައްމަދު ނާޒިމް ވިދާޅުވުމާއި ގުޅިގެން މިކަމަށް ރައްދު ދެއްވައި ޕީޕީއެމްގެ ފަރާތުން ޙީނާ ވަލީދު ވިދާޅުވީ، އިންޑިއާ އައުޓް ކެމްޕެއިން އިދިކޮޅުން ހުއްޓާނުލާނެ ކަމަށެވެ. އަދި އަބަދުވެސް މިނިވަން ކަމުގެ ދިފާއުގައި ޕީޕީއެމުން ތެދުވާނެ ކަމަށް ހީނާ ވިދާޅުވިއެވެ.
އެމްއެންޕީގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ނާޒިމް ވިދާޅުވީ، އިންޑިއާ ސިފައިން ރާއްޖޭގައި ތިބުމަށް އެޕާޓީންވެސް ތާއީދު ނުކުރާ ކަމަށެވެ. ނަމަވެސް ކުރީގެ ރައީސް އަބްދުﷲ ޔާމީންގެ އިސްނެންގެވުމަށް މިހާރު އިދިކޮޅުން ކުރިއަށްގެންދާ އިންޑިއާ އައުޓް ހަރަކާތަކީ ޖަރީމާއެއް ކަމަށެވެ.
މިހާރު އިދިކޮޅުން ކުރިއަށް ގެންދާ އިންޑިއާ އައުޓް ހަރަކާތުގެ މަގުސަދަކީ ކުރީގެ ރައީސް ޔާމީންގެ ފަސް އަހަރު ދުވަހުގެ ވެރިކަމުގައި ހަދާފައިވާ ގޯސްތައް ފޮރުވުން ކަމަށްވެސް ނާޒިމް ވަނީ ތުހުމަތުކޮށްފައެވެ.
