ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މުވައްޒަފުންނަށް ދެމުންދާ ހެލްތް އިންޝުއަރެންސްގައި މިހާރު މައިންބަފައިން ބައިވެރިކުރެވޭނެ ކަމަށް އެކުންފުނިން ބުނެފިއެވެ.
ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް މިއަދު ކުރެއްްވި ޓްވީޓެއްގައި ވިދާޅުވީ، "މިފަހަރުގެ ސްކީމްގައި އެލައިޑްގައި ހަމަޖެހިފައިވާ އުސޫލުން މުވައްޒަފު ބޭނުންވާނަމަ މައިންބަފައިން ވެސް ބައިވެރި ކުރެވޭނެ،" ކަމަށެވެ.
ސްޓެލްކޯއިން ބުނީ މުވައްޒަފުންގެ ކަންބޮޑުވުންތަކެއް އޮތް ސްޓެލްކޯގެ ހެލްތް އިންޝުއަރެންސް ސްކީމް ބަދަލުކޮށް، މިހާރު އެ ކަންބޮޑުވުންތަކަށް ހައްލު ހޯދައިދީފައިވާ ކަމަށެވެ.
މުވައްޒަފުންގެ ކަންބޮޑުވުންތަކެއް ހުރުމުން، އެކަމަށް ހައްލު ހޯދައިދިނުމުގެ ގޮތުން ސްޓެލްކޯއިން ވަނީ ކުރިން އަމަލުކުރަމުން އައި އިންހައުސް ހެލްތު އިންޝުއަރެންސް ސްކީމުގެ ބަދަލުގައި އެލައިޑް އިންޝުއަރެންސް މެދުވެރިކޮށް، މުވައްޒަފުންގެ ހެލްތު އިންޝުއަރެންސްގެ ކަންކަން ހަމަޖައްސަން ފަށައިފައެވެ.
