މި އަހަރުގެ ތެރޭގައި މޯލްޑިވިއަނަށް ބޮޑެތި ފްލައިޓްތައް ގެންނަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައްޔިތުންގެ މަޖިލިސް ހުޅުވުމަށް ރައީސް މުއިއްޒު އިއްވެވި ފުރަތަމަ ރިޔާސީ ބަޔާނުގައި އެމަނިކުފާނު ވިދާޅުވީ ރާއްޖޭގެ ގައުމީ އެއާލައިން މޯލްޑިވިއަންގެ ހިދުމަތް ފުޅާކޮށް، ދުނިޔޭގެ ގިނަ މަންޒިލްތަކަށް އުދުހުމަށްޓަކައި އެކަމަށް އެކަށޭނަ ބިޔަ މަތިންދާބޯޓު ފަހަރު މިއަހަރު ގެންނާނެ ކަމަށްވެ. ރައީސް އެގޮތަށް ވިދާޅުވި އިރު، މި އަހަރުގެ ތެރޭގައި މޯލްޑިވިއަނަށް ވައިޑް ބޮޑީ ކްރާފްޓް މަތިންދާ ބޯޓުތަކެއް ގެންނާނެ ކަން އެމަނިކުފާނު މީގެކުރިން ވެސް ވިދާޅުވެފައިވެއެވެ.
ރާއްޖޭގެ ޤައުމީ އެއަރލައިން، މޯލްޑިވިއަންގެ ޚިދުމަތް ފުޅާކޮށް، ދުނިޔޭގެ ގިނަ މަންޒިލްތަކަށް އުދުހުމަށްޓަކައި އެކަމަށް އެކަށޭނަ ބިޔަ މަތިންދާބޯޓުފަހަރު، މި އަހަރު އިރާދަކުރެއްވިއްޔާ ގެންނާނަން.
ރައީސް ވިދާޅުވީ ވައިޑް ބޮޑީ އެއާކްރާފްޓާއެކު މޯލްްޑިވިއަންގެ އޮޕަރޭޝަންތައް ފުޅާ ކުރެވޭނެ ކަމަށެވެ. އަދި ރާއްޖެ އަންނަ ފަތުރުވެރިންވެސް އިތުރު ކުރުމަށް ކުރެވޭ މަސައްކަތްތަކަށް އިތުރު ހަރުފަތަކަށް ގެންދެވޭނެ ކަމަށް ވެސް ރައީސް މުއިއްޒު ވިދާޅުވިއެވެ.
ރައީސް ވިދާޅުވީ ޑްރޯން ޑެލިވަރީ ސިސްޓަމް ތަޢާރުފްކުރުމަށް ބޭނުންވާ ރެގިއުލޭޓަރީ މަސައްކަތް ފަށައި، ޓެސްޓް ފްލައިޓުގެ ފުރަތަމަ ބުރު، 19 ޖަނަވަރީ 2024ގައި ކާމިޔާބުކަމާއެކީ ބޭއްވިފައިވާ ކަމަށާއި އަދި ވިޔަފާރި އުސޫލުން މި ޚިދުމަތް ފެށުމުގެ ކުރިއަށް، ޑްރޯން ރެގިއުލޭޝަން މަސައްކަތް ނިންމައި، އެކަން ކުރިއަށް ގެންދަން ވާނީ ކަނޑައަޅާފައި ކަމަށެވެ. އަދި މި ޑްރޯން ޑެލިވެރީ ސިސްޓަމާ ގުޅިގެން އަތޮޅުތެރެއަށް ބޭހާއި މެޑިކަލް ކޮންސިއުމަބަލްސް، ޑްރޯން މެދުވެރިކޮށް ފޯރުކޮށްދިނުމުގެ އިންތިޒާމު މިއަހަރު ތެރޭގައި ހަމަޖެހިގެންދާނެ ކަމަށް ރައީސް ވިދާޅުވި އެވެ.
މޯލްޑިވިއަނުން މިހާރު ރާއްޖޭގެ އެތެރޭގެ އުދުހުންތަކުގައި ބޭނުން ކުރަނީ 13 ފްލައިޓަކާއި 11 ސީޕްލޭން ބޭނުން ކުރެއެވެ.
