ގއ. ގެމަނަފުށީގައި އަލަށް ބިނާ ކުރަން ނިންމި މިސްކިތުގެ ބިންގާ އަޅައިފިއެވެ.
އިސްލާމިކް މިނިސްޓްރީން ބުނީ މިއީ 300 މީހުންގެ ޖާގައިގެ މިސްކިތެއް ކަމަށެވެ. މި މިސްކިތުގެ ބިންގާ އަޅުއްވައި ދެއްވީ އިސްލާމިކް މިނިސްޓްރީގެ ސުޓޭޓް މިނިސްޓަރު އަބުދުﷲ ސައުދާނެވެ.
ގެމަނަފުށީގައި އަލަށް ބިނާކުރާ މިސްކިތުގެ މަސައްކަތް ހަވާލުކޮށްފައިވަނީ އީވޯސަން މޯލްޑިވްސް ޕްރައިވެޓް ލިމިޓެޑާއެވެ. އެ ކުންފުންޏާ ހަވާލުކުރީ މިދިޔަ އަހަރުގެ އޮގަސްޓް މަހުގެ ތެރޭގައެވެ. މިއީ ދައުލަތުގެ ބަޖެޓުން 10 މިލިއަނަށް ވުރެ ގިނަ ރުފިޔާ ހަރަދުކޮށްގެން އަމަލީ މަސައްކަތް ފެށިގެންދާތާ އަހަރެއްގެ ތެރޭގައި ނިންމަން ޖެހޭ މިސްކިތެކެވެ.
މި މިސްކިތަކީ ފިރިހެނުންނާއި އަންހެނުންނަށް ވެސް ނަމާދުކުރެވޭ ގޮތަށް ބިނާކުރާ މިސްކިތެކެވެ.
ކުރިޔަށް އޮތް ރަމަޟާންމަހަށް ހާއްސަކޮށް ރާއްޖޭގެ އެކި ކަންކޮޅުތަކުގައި ހުރި މިސްކިތްތަކުގެ އާބާތުރަ ފިލުވުމާއި މިސްކިތް މަރާމާތްކޮށް އާ މިސްކިތްތައް އެޅުމުގެ މަސައްކަތް މިނިސްޓްރީން ދަނީ ކުރަމުންނެވެ. އަދި ރައީސް، ޑރ. މުއިއްޒުގެ ވައުދުފުޅާ އެއްގޮތަށް މިސަރުކާރުން ވަނީ މިސްކިތްތައް މަރާމާތު ކުރުމާއި އާބާތުރަ ފިލުވުމަށް ކަނޑައަޅާފައިވާ ބަޖެޓު ތިން ގުނައަށް ބޮޑުކޮށްފައެވެ. އެގޮތުން މިސަރުކާރުން ވަނީ އެމަސައްކަތަށް ބަޖެޓުގައި 15 މިލިއަން ރުފިޔާ ހަމަޖައްސައިފައެވެ.
މިއަހަރުން ފެށިގެން އަލަށް އިމާރާތް ކުރާ މިސްކިތްތަކުގެ އަސާސީ ކަމެއްގެ ގޮތުގައި މަޝްރޫޢުގެ ތެރެއިން، މިސްކިތް ނިމޭ އިރު ސޯލާ ޕެނަލް ހަރުކުރާ ގޮތަށް އުސޫލު ވަނީ މިހާރު ހަމަޖައްސާފައެވެ.
