އީރާނުގެ ރައީސް އިބްރާހީމް ރައީސީ ދަތުރުކުރެއްވި ހެލިކޮޕްޓަރު ވެއްޓި، ރައީސީ އަވަހާރަވެފައިވާ ކަމަށް އެ ގައުމުގެ ދައުލަތުގެ މީޑިއާއިން ބުނެފި އެވެ.
އީރާނުގެ ލޯކަލް މީޑިއާތަކުން ރިޕޯޓްކޮށްފައިވާ ގޮތުގައި ވަރްޒާގާން ޑިސްޓްރިކްޓްގެ އެ ސަރަހައްދަށް ބޯކޮށް ވާރޭވެހެމުންދާއިރު، ގަދަ ދުންފިނީގައި ސާޗް އެންޑް ރެސްކިއު ޓީމްތަކަށް މަސައްކަތް ކުރުމުގައި ދަތިތަކެއް ދިމާވާނެ އެވެ.
މި ހާދިސާ ހިނގާފައިވަނީ ހުކުރު ދުވަހު އިރުމަތީ އަޒަރުބައިޖާން ޕްރޮވިންސްގެ ވަރްޒާކާން އާއި ޖޯލްފާ ސިޓީއާ ދެމެދުގައި އޮންނަ ޑިޒްމާގައި އަޒަރުބައިޖާންގެ ރައީސް އިލްހާމް އަލިޔޭވްއާއެކު ޑޭމްއެއް އިފްތިތާހު ކުރުމަށް ބޭއްވި ރަސްމިއްޔާތެއް ނިންމަވާލައްވާފައި ރައީސް އެނބުރި ވަޑައިގަންނަވަނިކޮށެވެ. އަޒަރްބައިޖާނަށް ކުރެއްވި ދަތުރުފުޅުގައި ރައީސީއާއިއެކު އެގައުމުގެ ފޮރިން މިނިސްޓަރު ހުސައިން އާމިރް އަބްދުﷲ އަންވެސް ބައިވެރިވެވަޑައިގަތެވެ.
މި ހާދިސާ ހިނގިތާ 15 ގަޑިއިރެއްހާ އިރު ފަހުން، އެ ހެލިކޮޕްޓަރާ ހަމައަށް ދެވުނު އިރު، ހެލިކޮޕްޓަރު އެކީގައި އަނދާފައިވާ ކަމަށް މީޑިއާ ރިޕޯޓުތައް ބުންޏެވެ.
ރައީސް ރައިސީ އާއި ފޮރިން މިނިސްޓަރު ހުސައިން އަމީރު އަބްދުﷲ އާއި އެހެނިހެން ބައެއް އޮފިޝަލުން ދަތުރުކުރަމުން ދިޔަ ހެލިކޮޕްޓަރުގައި ދަތިތަކެއް ދިމާވެ “ހާޑް ލޭންޑިން” އެއް ކުރަން މަޖުބޫރުވި ކަމަށް އީރާނުގެ ދައުލަތުގެ މީޑިއާއިން ރިޕޯޓްކޮށްފައި ވެއެވެ.
