އިންޑިއާގެ މަޝްހޫރު ދުވުންތެރިޔާ މިލްކާ ސިންގް ކޮވިޑް-19 ބަލީގައި މަރުވެއްޖެ އެވެ.
"ދަ ފްލައިންގް ސީކް" ގެ ނަމުން މަޝްހޫރު މިލްކާ އަކީ 1960 ވަނަ އަހަރުގެ އޮލިމްޕިކްސްގައި 400 މީޓަރު ދުވުމުން ހަތަރު ވަނަ ހޯދި ދުވުންތެރިޔާ އެވެ.
އިއްޔެ މިލްކާ މަރުވިއިރު މީގެ ހަފްތާއެއް ކުރިން އޭނާގެ އަންހެނުން ނިރްމަލް ކޯރް ވެސް މަރުވީ ކޮވިޑު ބަލީގަ އެވެ.
މިލްކާ ކޮވިޑަށް ޕޮޒިޓިވްވިކަން އެނގުނީ މިދިޔަމަހު އެވެ. އޭރު އޭނާ ދިޔައީ އެހެން ބައެއް ބަލިތަކަށްވެސް ފަރުވާ ހޯދަމުންނެވެ. މަރުވިއިރު މިލްކާގެ އުމުރަކީ 94 އަހަރެވެ. މިލްކާގެ އަންހެނުން މަރުވީ 84 އަހަރުގަ އެވެ. މި ދެމީހުންގެ ކައިވެންޏަށް 54 ވަނީ ވެފަ އެވެ.
މިލްކާ މަރުވުމާއި ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީ ވަނީ ތައުޒިޔާގެ މެސެޖެއް ފޮނުވައިފަ އެވެ. މޯދީ ވިދާޅުވީ މިލްކާއަކީ އިންޑިއާ މިނިވަން ވުމަށްފަހު ގައުމު ދުށް އެންމެ ފުރަތަމަ ކުޅިވަރު ޝަހުސިއްޔަތު ކަމަށެވެ.
މިލްކާގެ ހަޔާތުގެ މައްޗަށް 2013 ވަނަ އަހަރު ވަނީ ބޮލީވުޑް ފިލްމެއްވެސް އުފައްދައިފަ އެވެ. "ބާގް މިލްކާ ބާގް" ގެ ނަމުގައި އުފެއްދި އެ ފިލްމުގައި މިލްކާގެ ރޯލު އަދާކުރީ އެކްޓަރު ފަރްހާން އަކްތަރު އެވެ.
