ރަޝިޔާގައި ކޮވިޑް-19 ޖެހިގެން މަރުވާ މީހުންގެ އަދަދު އިތުރުވާން ފަށައިފި އެވެ.
އެގައުމުގެ ކަމާބެހޭ އިދާރާތަކާއި ހަވާލާދީ އަލްޖަޒީރާއިން ރިޕޯޓު ކުރި ގޮތުގައި އިއްޔެ އެކަނިވެސް ރަޝިޔާއިން ވަނީ 697 މީހުން މި ބަލީގައި މަރުވެފަ އެވެ. މިއީ ކޮވިޑުގައި މަރުވާ މީހުންގެ އަދަދު އުފުލިފައި ހުންނަތާ ތިންވަނަ ދުވަހެވެ. އޭގެ ކުރިން ހުކުރު ދުވަހުވެސް 679 މީހުން ވަނީ ކޮވިޑުގައި އެގައުމުން މަރުވެފަ އެވެ.
އިއްޔެ ރަޝިޔާއިން 24،439 ކޮވިޑްގެ އާ ކޭސް ވަނީ ރިޕޯޓުކޮށްފަ އެވެ. މިއީ މި އަހަރު ކޮވިޑު އަދަދު މިހާ މައްޗަށް އުފުލުނު ފުރަތަމަ ފަހަރެވެ. އެގައުމުގައިވެސް މިހާރު ފެތުރެމުން ދަނީ އިންޑިއާގައި އުފެދުނު ޑެލްޓާ ވޭރިއެންޓުކަމަށް އޮތީ ބެލެވިފަ އެވެ.
ކޮވިޑު އަދަދުތައް އުފުލެމުން ދިޔަނަމަވެސް މިވަގުތު ރަޝިޔާގެ އެއްވެސް ސަރަހައްދެއް ލޮކްޑައުން ކުރަން މަޝްވަރާއެއް ނުކުރެ އެވެ.
ރަޝިޔާގައި ކޮވިޑުގެ ހާލަތު އެންމެ ގޯހީ މޮސްކޯގަ އެވެ. އެތަނުން އެކަނިވެސް 7،446 ކޮވިޑު ކޭސް އިއްޔެ ފެނުނެވެ. އަނެއްކޮޅުން މިހާރު ޔޫރޯ 2020 ކުއާޓާ ފައިނަލްގެ މެޗުތައް ކުރިއަށް ގެންދާ އެސްޓީ ޕީޓާޒްބާރގް ގައި އިއްޔެ 1،733 ކޮވިޑް ކޭސް ރިޕޯޓު ކުރި އެވެ. ޕީޓާޒްބާރގްއިން 110 މީހުން އިއްޔެ މަރުވެސް ވި އެވެ.
ކަމާއިބެހޭ އިދާރާތަކުން ބުނާ ގޮތުގައި ޔޫރޯ މެޗުތަކުގައި ސަޕޯޓަރުންގެ ފަރާތުން ކޮވިޑު ރައްކާތެރިކަމުގެ ފިޔަވަޅުތަކާއި ހިލާފުވާ މަންޒަރު ދަނީ ފެންނަމުންނެވެ. އެގޮތުން ބައެއް ފަރާތްތަކުން މާސްކު ނާޅައި އާންމުންގެ ތެރެއަށް ނިކުމެ އުޅޭކަން ފާހަގަކޮށްލެވެ އެވެ.
ރަޝިޔާގައި ވެކްސިން ދިނުމުގެ ޕްރޮގުރާމުގައި ކޮންމެވެސް ވަރެއްގެ ލަސްތަކެއް ވަނީ ފާހަގަކުރެވިފަ އެވެ. އެގޮތުން 146 މިލިއަން މީހުންގެ ތެރެއިން މިހާތަނަށް ވެކްސިން ދެވުނީ އެންމެ 16 އިންސައްތަ މީހުންނަށެވެ. ކޮވިޑުގެ އިތުރު ރާޅެއް ރަޝިޔާގައި ނެގިއިރު ވީހާވެސް ގިނަ ފަރާތްތަކެއް ވެކްސިން ޖެހުމަށް ސަރުކާރުން ދަނީ ބާރު އަޅަމުންނެވެ.
މޮސްކޯގައި ހާލަތު ގޯސްވުމާއި ގުޅިގެން ފިޔަވަޅުތައް ވަނީ ވަރުގަދަ ކޮށްފަ އެވެ. އެގޮތުން ކެފޭ، ބާ އަދި ރެސްޓޯރެންޓުތަކަށް އާންމުކޮށް މީހުން ގޮސް އުޅުން އެތަނުގައި ވަނީ މަނާކޮށްފަ އެވެ. އެތަންތަނަށް ހިދުމަތް ހޯދަން ދެވޭނީ ހަމައެކަނި ވެކްސިން ފުރިހަމަ ކޮށްފައިވާ މީހުންނަށެވެ. ވެކްސިން ޖެހި ކަމުގެ ލިޔުން ދެއްކުމުން ނޫނީ ހިދުމަތް ނުދޭން މޮސްކޯގެ ކެފޭ، ރެސްޓޯރެންޓުތަކަށް މިހާރު ވަނީ އަންގައިފަ އެވެ.
މޮސްކޯގެ މޭޔަރު ސާޖެއި ސޮބްޔާނިން ވިދާޅުވީ މިހާތަނަށް ކޮވިޑު ވެކްސިންގެ ފުރަތަމަ ޑޯޒް މޮސްކޯގެ 2.7 މިލިއަން މީހުން ޖަހާފައިވާ ކަމަށެވެ. އަދި މިހާރު ދުވާލެއްގެ މައްޗަށް މަދުވެގެން 60،000 އެއްހާ މީހުންނަށް ވެކްސިން ދެމުން ދާކަމަށްވެސް އޭނާާ ވިދާޅުވި އެވެ. މިރޭޓުން ދާނަމަ އަންނަ ހަފްތާ ނިމުމުގެ ކުރިން ވެކްސިންގެ ފުރަތަމަ ޑޯޒް ޖެހި މީހުންގެ އަދަދު 3 މިލިއަނަށް އަރާނެ ކަމަށް ލަފާ ކުރެވެ އެވެ.
