މެލޭޝިޔާއިން ކޮވިޑް-19 އަށް ޕޮޒިޓިވްވާ މީހުންގެ އަދަދު ކުރިއަށް އޮތް ހަފްތާ ތަކުގައި ދަށަށް ދާން ފަށާނެކަމަށް ބެލެވޭ ކަމަށް އެގައުމުގެ ސަރުކާރުން ބުނެފި އެވެ.
މިހާރު މެލޭޝިޔާގައި ދުވާލަކަށް އެވަރޭޖުކޮށް 7،800 އެއްހާ މީހުން އަންނަނީ ބައްޔަށް ޕޮޒިޓިވް ވަމުންނެވެ. މިދިޔަ ހޮނިހިރު ދުވަހަކީ ކޭސްތައް އެންމެ މައްޗަށް ދިޔަ ދުވަހެވެ. އެގޮތުން އެދުވަހު އެކަނި ވަނީ 9،353 މީހުން ކޮވިޑަށް ޕޮޒިޓިވް ވެފަ އެވެ. އިއްޔެވެސް ނަމްބަރު ހުރީ 9،105 ގަ އެވެ.
މެލޭޝިޔާ ހެލްތު ޗީފް ނޫރު ހިޝާމް އަބްދުﷲ ވިދާޅުވީ މިދިޔަ ދުވަސްތަކުގައި ކޮވިޑުގެ ނަމްބަރުތައް އުފުލިފައިވަނީ ގިނަ އަދަދަކަށް ޓެސްޓު ހެދުމުންކަމަށެވެ. ހާއްސަކޮށް ކުއަލަ ލަމްޕޫރާއި ސެލަންގޯރުގެ ވިޔަފާރި މަރުކަޒުތަކުގައި ގިނަ އަދަދެއްގެ މީހުން ސްކްރީން ކުރެވުނުކަން އޭނާ ފާހަގަކުރެއްވި އވެެ.
"މިހާރު ސަރުކާރުން، ކްލޭންގް ވާލޭ ގެ ސަރަަހައްދުތަކުގައި އިއުލާން ކޮށްފައި އޮތް ލޮކްޑައުންގެ ސަބަބުން ކޮވިޑު ނަމްބަރުތަކަށް ބަދަލު އަންނަނާ ކަމަށް ބެލެވޭ."
- ނޫރު ހީޝާމް
އޭނާ ވިދާޅުވީ މީހުންގެ މޫވްމެންޓްސް ކޮންޓްރޯލް ކުރެވިއްޖެ ނަމަ ކުރިއަށް އޮތް ހަފްތާއެއް ނުވަތަ ދެ ހަފްތާ ތެރޭގައި ނަމްބަރުތައް ދަށަށްގޮސް ހާލަތު ރަނގަޅުވާނެކަމަށް ބެލެވެ އެވެ. އެއާއެކު ވެކްސިން ދިނުމުގެ ޕްރޮގުރާމްވެސް އިތުރަށް ހަލުވި ކުރަންޖެހޭ ކަން އޭނާ ފާހަގަކުރެއްވި އެވެ.
މިމަހުގެ 5 ވަނަ ދުވަހުން ފެށިގެން މެލޭޝިޔާގައި ދުވާލެއްގެ މައްޗަށް ތިން ލައްކައެއްހާ މީހުންނަށް އަންނަނީ ވެކްސިން ދެމުންނެވެ. މިހާތަނަށް ވެކްސިން ޖެހޭ އުމުރުފުރާގެ 22 އިންސައްތައަށް ވަނީ ފުރަތަމަ ޑޯޒް ދީފަ އެވެ. އެހެންނަމަވެސް ދެވަނަ ޑޯޒް ދެވުނީ އެންމެ 9.75 އިންސައްތަ އަށެވެ.
ނޫރު ހިޝާމް ވިދާޅުވީ އެންމެ ބޮޑު ސަމާލުކަމެއް ދެނީ އަވަސް އަރުވާލައިގެން އިގްތިސޯދީ ސެކްޓަރަށް ލުނި ނުދިނުމަށެވެ. މީގެ ކުރިންވެސް މެލޭޝިޔާގައި ކޮވިޑު ނަމްބަރުތައް އިތުރުވީ ބައެއް ދާއިރާތަކުން މާ ބޮޑަށް ލުއި ދީ މޫވްމެންޓްސް ގިނަވުމުން ކަމަށް އޭނާ ވިދާޅުވި އެވެ. ލުއި ދެމުން ދާނީ ސިއްހީ އިދާރާތަކުން ލަފާދޭ ގޮތަށް ހަރުދަނާ ކަމާއިއެކު ކަމަށް ނޫރު ހިޝާމް ވިދާޅުވި އެވެ.
މެލޭޝިޔާ ސަރުކާރުން ދަނީ އެގައުމުގައި ހޮސްޕިޓަލު ކެޕޭސިޓީ އިތުރު ކުރުމުގެ މަސައްކަތްތަކެއްވެސް ފަށައިފަ އެވެ. ހާއްސަކޮށް އައިސީޔޫތައް އިތުރުކުރަން އަންނަނީ ސަމާލުކަން ދެމުންނެވެ. ނޫރު ހިޝާމް ވިދާޅުވީ ހާލަތު ސީރިއަސް ޕޭޝަންޓުން އައިސީޔޫގައި ހޭދަކުރާ މުއްދަތު އިތުރުވުމުން އައިސީޔޫތައް ފުރުމުގެ ބިރު އެބަ އޮތްކަމަށެވެ.
