ދެކުނު ކޮރިއާގައި ކޮވިޑް-19 ގެ ހާލަތު ގޯސްވާން ފެށުމުން ބައެއް ސަރަހައްދުތަކުގައި ރައްކާތެރިކަމުގެ ފިޔަވަޅުތައް ވަރުގަދަކޮށްފި އެވެ.
އެގައުމުގެ އިދާރާތަކުން ވަނީ މިހާރު ފެތުރެމުން ދަނީ އިންޑިއާގެ ޑެލްޓާ ވޭރިއެންޓުކަން ކަށަވަރުކޮށްދީފަ އެވެ. އެންމެ ހާލަތު ގޯސްވެފައިވަނީ ސެއޯލް ރީޖަންގަ އެވެ. މިއީ ދެކުނު ކޮރިއާގައި ކޮވިޑުގެ ހާލަތު އެންމެ ގޯސްވި ފަހަރެވެ.
އިއްޔެ އެކަނިވެސް އެގައުމުގެ 1،615 މީހުން ވަނީ ކޮވިޑަށް ޕޮޒިޓިވްވެފަ އެވެ. މި އަދަދަކީ އޭގެ ކުރިން އެންމެ މައްޗަށް ދިޔަ 1،378 ގެ ރެކޯޑު ފަހަނަ އަޅާ ދިޔަ ފުރަތަމަ ދުވެހެވެ.
ރިޕޯޓުތައް ބުނާ ގޮތުން އިއްޔެ އިރުއޮއްސި 6 ޖެހުމުން ފެށިގެން ދެކުނު ކޮރިއާގައި ފިޔަވަޅުތައް ވަނީ ވަރުގަދަ ކޮށްފަ އެވެ. ލެވެލްތަކަކަށް ބަހާލައިގެން ފިޔަވަޅުތައް އަޅާފައިވާއިރު ސެއޯލް އާއި އޭގެ ވަށައިގެންވާ ސަރަހައްދުގައި އަޅާފައިވަނީ ލެވެލް 4 ގެ ފިޔަވަޅުތަކެވެ. މިއީ އެންމެ ހަރުކަށި ހާލަތެވެ. އެގޮތުން މި ހާލަތުގައި ދެ މީހުންނަށްވުރެއް ގިނައިން ބޭރުގައި އެއްވެ ނޫޅެވޭނެ އެވެ.
ދެކުނު ކޮރިއާގެ އެހެން ގިނަ ސަރަހައްދުތަކުގައި ވަނީ ލެވެލް 2 އަށް ފިޔަވަޅުތައް ވަރުގަދަ ކޮށްފަ އެވެ. އެތަންތަނުގައި އެންމެ ގިނަވެގެން އެއްވެ އުޅެވޭނީ 8 މީހުންނަށެވެ. މީގެ އިތުރުން ލެވެލް 2 އާއި އެއަށްވުރެއް މަތީ ލެވެލްތަކުގެ ތަންތަނުގައި ރޭގަނޑު 12 ގެ ފަހުން ކެފޭ ރެސްޓޯރެންޓުގެ ހިދުމަތް ނުދެވޭނެ އެވެ.
ދެކުނު ކޮރިއާގައި ކޭސްތައް އިތުރުވާ ޕެޓާންއަށް ބަލާއިރު ކެޕިޓަލް ސިޓީގައި ބަލި ފެތުރެމުންދާކަމަށް އޮތީ ބެލެވިފަ އެވެ. ސެއޯލްއާއި އޭގެ ވަށައިގެންވާ ސަރަހައްދުގައި ހަފްތާއެއްގެ ތެރޭގައި ޕޮޒިޓިވްވާ މީހުންގެ އަދަދު ވަނީ ދެގުނައަށް އިތުރުވެފަ އެވެ.
ކޮވިޑް-19 ގެ ބަލިމަޑުކަން ދުނިޔޭގައި ފެތުރެން ފެށީއްސުރެއް މިއަދާއި ހަމައަށް އެންމެ ހާލަތު ރަނގަޅު އެއް ގައުމުގެ ގޮތުގައި ފާހަގަކުރެވޭ ދެކުނު ކޮރިއާގައި މީގެ ކުރިން އެޅި ހަރުދަނާ ފިޔަވަޅުތަކުގެ ސަބަބުން ކޭސްތައް ވަރަށް ބޮޑަށް ކޮންޓްރޯލް ކުރި އެވެ. މިހާތަނަށް އެގައުމުގައި ކޮވިޑަށް ޕޮޒިޓިވްވީ 171،911 މީހުންނެވެ. އެއީ ޖުމްލަ އާބާދީގެ ގާތްގަނޑަކަށް 0.3 އިންސައްތަ އެވެ. ބަލީގައި އެގައުމުން މަރުވީ 2،048 މީހުންނެވެ.
