ޖެހިޖެހިގެން ތިން ދުވަހު ކޮވިޑު-19 އަށް ޕޮޒިޓިވްވި މީހުންގެ އަދަދު ރެކޯޑު އަދަދަކަށް މަތީގައި ހުރުމުން ތައިލޭންޑުގައި ރައްކާތެރިކަމުގެ ފިޔަވަޅުތައް ވަރުގަދަ ކޮށްފި އެވެ.
އަލަށް އެޅި ފިޔަވަޅުތަކުގެ ތެރޭގައި ދަތުރުކުރުން ކޮންޓްރޯލް ކުރުމާއި، މޯލްތައް ބަންދު ކުރުމުގެ އިތުރުން ތިން ޕްރޮވިންސެއްގައި ރޭގަނޑު ކާފިއު ހިންގަން ނިންމުން ހިމެނެ އެވެ.
މިއަދު އެގައުމުގައި ކޮވިޑު ޖެހިގެން 11،397 މީހަކު ވަނީ ރިޕޯޓު ކޮށްފަ އެވެ. އަދި ބަލީގައި 101 މީހަކު ވަނީ މަރުވެފަ އެވެ. މިއާއެކު ޖުމްލަ ކޮވިޑް ކޭސްތަކުގެ އަދަދު ވަނީ 403،386 އަށް އަރައިފަ އެވެ. މަރުވި މީހުންގެ އަދަދަކީ 3،341 އެވެ.
ތައިލޭންޑުގައި ގިނަ އަދަދެއްގެ މީހުން ޕޮޒިޓިވްވާން ފެށީ މިދިޔަ އޭޕްރީލް މަހުގެ ތެރޭގައި އިންޑިއާގެ ޑެލްޓާ ވޭރިއެންޓާއި އަލްފާ ވޭރިއެންޓު ފެތުރެން ފެށުމުންނެވެ.
އަންނަ އަންގާރަ ދުވަހުން ފެށިގެން ތައިލޭންޑުގެ ޗޮންބުރީ، އަޔުއްތަޔާ ގެ އިތުރުން ޗަޗޯންގްރާއޯ ޕްރޮވިންސްގައި ރޭގަނޑު 9 އިން ފެށިގެން ފަތިހު 4 އަށް ކާފިއު ހިންގާނެ އެވެ.
މިދިޔަ ހަފްތާގެ ހޯމަ ދުވަހުން ފެށިގެން ބެންކޮކް ހިމެނޭ ގޮތަށް ޖުމްލަ 9 ޕްރޮވިންސެއްގައި އަންނަނީ ކާފިއު ހިންގަމުންނެވެ. ހާއްސަކޮށް ސިއްހީ ހިދުމަތުގެ ފެންވަރު ދަށް ޕްރޮވިންސްތަކުގައި ފިޔަވަޅުތަކަށް ލުއި ނުދީ އޮންނަތާ މިހާރު ވަނީ ދުވަސްތަކެއް ވެފަ އެވެ.
ތައިލޭންޑުގެ ސަރުކާރުން ބުނީ ކުރިއަށް އޮތް ގިނަ މަސްތަކަކަށް މި ފިޔަވަޅުތައް ދިގުދެމިގެން ހިނގައިދާނެ ކަމަށާއި ނަމްބަރުތައް އަދިވެސް މައްޗަށް ދާނަމަ ފިޔަވަޅުތައް އިތުރަށް ހަރުކަށި ކުރުމުގެ ފުރުސަތު އޮންނާނެ ކަމަށެވެ.
