ދެކުނު އެފްރިކާގެ ގައުމެއް ކަމަށްވާ ޒިމްބާބުވޭގައި ކޮވިޑް-19 ގެ އާ ރާޅެއް އުފެދި ގިނަ ބަޔަކަށް ބަލި ޖެހެމުން ދާއިރު، ބަލިން ދިފާއުވުމަށް ވެކްސިން ޖަހަން ދިގު ކިއުތައް ހަދާލައިފި އެވެ.
ސިއްހީ ހިދުމަތުގެ ފެންވަރު އިންތިހާއަށް ދަށް ޒިމްބާބުވޭ އަކީ ނިސްބަތުން ފަގީރު ގައުމެކެވެ. އެހެންވެ ކޮވިޑު ފެތުރެން ފެށުމާއިއެކު އެގައުމުގައި މަރުވާ މީހުންގެ އަދަދު ވަނީ އިންތިހާއަށް އިތުރުވެފަ އެވެ.
ޒިމްބާބުވޭއަށް ޗައިނާއިން ވަނީ މިދިޔަ ފެބުރުއަރީ މަހުގެ ތެރޭގައި ސިނޯފާމް ވެކްސިންގެ 200،000 ޑޯޒް ހަދިޔާކޮށްފަ އެވެ. އެހެންނަމަވެސް އެގައުމުގައި ވެކްސިނަށް އޮތް ތަރުހީބު ވަރަށް ކުޑަ އެވެ. ގިނަ މީހުން ވެކްސިން ޖަހަން ބިރުން އުޅުނީ ހޭލުންތިވުން ކުޑަވުމުގެ ސަބަބުންނެވެ. އެގޮތުން ދެ މަސްދުވަސް ވެގެން ދިޔައިރުވެސް ވެކްސިންގެ ފުރަތަމަ ޑޯޒް ޖެހީ އެންމެ 76،995 މީހުންނެވެ.
އެހެންނަމަވެސް ކޮވިޑު އާންމުވާން ފެށުމާއެކު ވެކްސިނަށް އޮތް ތަރުހީބު އިތުރުވެ އެގައުމުގެ އެކި ސަރަހައްދުތަކުގައި ވަނީ ވެކްސިން ސެންޓަރުތައް ގާއިމްކޮށްފަ އެވެ. މިދިޔަ ޖޫން މަހުގެ ނިޔަލަށް 777،161 މީހުން ވަނީ ވެކްސިން ޖަހައިފަ އެވެ.
މިހާރު ދުވާލެއްގެ މައްޗަށް ގާތްގަނޑަކަށް 60،000 އެއްހާ މީހުންނަށް ވެކްސިން ދެމުން ދާއިރު ފުރަތަމަ ޑޯޒް ފުރިހަަމަ ކުރި މީހުންގެ އަދަދު ވަނީ މިލިއަނަކުން މައްޗަށް ގޮސްފަ އެވެ. ޒިމްބާބުވޭގައި ދެމުން ދަނީ ޗައިނާގެ ސިނޮވެކް ވެކްސިނާއި، އެގައުމުގެ ސިނޯފާމް ވެކްސިންގެ އިތުރުން ރަޝިޔާގެ ސްޕަޓްނިކް ވީ ވެކްސިން އަދި އިންޑިއާގެ ކޮވެކްސިން އެވެ.
14 މިލިއަން މީހުންގެ އާބާދީއެއް އޮންނަ ޒިމްބާބުވޭއަށް މިހާތަނަށް ލިބިފައިވަނީ 4.2 މިލިއަން ވެކްސިން ޑޯޒް އެވެ. އިތުރު 1.5 މިލިއަން ޑޯޒް ކުރިއަށް އޮތް މަދު ދުވަހެއްގެ ތެރޭގައި ލިބޭނެ ކަމަށް އޮތީ ބެލެވިފަ އެވެ.
ޒިމްބާބުވޭގައި މީގެ ކުރިން ކޮވިޑުގެ ދެ ރާޅެއް ނެގި ނަމަވެސް ބަލި އިތުރަށް ފެތުރުނަ ނުދީ ކޮންޓްރޯލް ކުރެވުނެވެ. އެހެންނަމަވެސް ތިންވަނަ ރާޅާއެކު ޕޮޒިޓިވްވި މީހުންގެ އަދަދު ވަނީ ދެގުނައަށް އިތުރުުވެ 86،000 އަށް އަރައިފަ އެވެ. މިހާތަނަށް އެގައުމުން މި ބަލީގައި 2،697 މީހުން ވަނީ މަރުވެފަ އެވެ.
