މުސްލިމުންގެ އަޟްހާ އީދާއި ދިމާކޮށް އީރާނު ސަރުކާރުން އެގައުމުގައި ލޮކްޑައުން އިއުލާންކޮށް ރައްކާެތެރިކަމުގެ ފިޔަވަޅުތައް ވަރުގަދަކޮށްފި އެވެ.
އިއްޔެއިން ފެށިގެން އީރާނު ސަރުކާރުން ވަނީ ތެހެރާންގެ ޕްރޮވިންސް ތަކާއި އަލްބޮރްޒްގެ ސަރަހައްދުތައްވެސް ލޮކްޑައުންކޮށްފަ އެވެ. ލޮކްޑައުން ކުރީ ހަ ދުވަހުގެ މުއްދަތަަކަށެވެ.
މިހިނގާ ޖުލައި މަހަކީ އީރާނުގައި ކޮވިޑުގެ ހާލަތު ގޯސްވާ ފެށި މަހެވެ. އެގޮތުން މިމަހު އެކަނިވެސް 200 މީހުން ވަނީ ބަލީގައި މަރުވެފަ އެވެ. އަނެއްކޮޅުން ދުވާލެއްގެ މައްޗަށް 25،000 އެއްހާ މީހުން ބައްޔަށް ޕޮޒިޓިވް އެވެ.
އަޟްހާ އީދު ދުވަހުގެ މުނާސަބަތާއި ދިމާކޮށް އީރާނުގައި އެކި އެއްވުންތައް އާންމުކޮށްވެސް ބާއްވަ އެވެ. އަދި އެއްތަނުން އަނެއްތަނަށް ދަތުރުކުރުމާއި ކުޅިވަރުތައް ކުޅެ ހަދަ އެވެ. އެހެންވެ މިފަހަރުގެ އީދާ ދިމާކޮށް ކޮވިޑުގެ ހާލަތަށް ބަލައި ސަރުކާރުން ވަނީ ލޮކްޑައުން އިއުލާން ކޮށްފަ އެވެ.
ކޮވިޑް-19 ގައި އީރާނުން މިހާތަނަށް 87،000 މީހުން ވަނީ މަރުވެފަ އެވެ. މިދިޔަ އަހަރު ނިމުނުއިރު ބަލީގެ ހާލަތު ކޮންމެވެސް ވަރަކަށް ރަނގަޅުވި ނަމަވެސް މެދު އިރުމަތީގައި އުފެދުނު ކޮވިޑުގެ އާ ރާޅުގައި މިއަހަރުގެ ފެބުރުއަރީން ފެށިގެން އީރާނުގެ ހާލަތުވެސް ދިޔައީ ގޯސްވަމުންނެވެ.
އީރާނުގައިވެސް މިހާރު ފެތުރެމުން ދަނީ އެހެން ގިނަ ގައުމުތަކެކޭ އެއްގޮތަށް އިންޑިއާގެ ޑެލްޓާ ވޭރިއެންޓެވެ. އީރާނުގައި އިއުލާންކުރި ފުލް ލޮކްޑައުންގައި ސަރުކާރު އޮފީސްތަކާއި، ބޭންކުތައް ބަންދުވާނެ އެވެ. އަދި އެއްވެސް ކަހަލަ ދީނީ ނުވަތަ ސަގާފީ ކަމެއް ކުރިއަކަށް ނުގެންދެވޭނެ އެވެ. އަދި ދަތުރު ކުރުން މަނާކޮށް ޒަރޫރީ ބޭނުމެއްގައި ނޫނީ ބޭރަށް ނިކުތުންވެސް ވަނީ މަނާކޮށްފަ އެވެ.
މިހާތަަނަށް އައިއިރު އީރާނުގައި ވަނީ ކޮވިޑް ދިފާއު ވެކްސިންގެ 5.5 މިލިއަން ޑޯޒް ދީފަ އެވެ. އެގައުމަކީ 83 މިލިއަން މީހުންގެ އާބާދިއެއް އޮންނަ ގައުމެއް ކަމުން ވެކްސިން ދެވިފައިވަނީ ނިސްބަތުން ވަރަށް މަދު މީހަކަށެވެ.
މިދިޔަ މަހުގެ ތެރޭގައި އިރާނުން ވަނީ އެގައުމުގެ އަމިއްލަ ވެކްސިނެއް އުފައްދައިފަ އެވެ. އެ ވެކްސިނަކީ މިހާތަނަށް މުޅި ދުނިޔޭގައިވެސް އުފެއްދި އެންމެ ވަރުގަދަ ވެކްސިން ކަމަށް އެގައުމުން ބުނެ އެވެ. އެގޮތުން އެންމެ ނުރައްކާތެރި ކޮވިޑު ވޭރިއެންޓު، އިންޑިއާގެ ޑެލްޓާ ވޭރިއެންޓާއި ދެކޮޅަށް އީރާނުގެ ވެކްސިން 90 އިންސައްތަ މަސައްކަތް ކުރާކަމަށް އެގައުމުން ވަނީ ބުނެފަ އެވެ.
