ފިލިޕިންސްގެ ވެރިރަށް މެނިލާގެ ބައެއް ހިސާބުތަކުގައި ފެންބޮޑުވެ އެތަނުގައި ދިރިއުޅޭ އެތައް ހާސް ބަޔަކު ވަގުތީ ހިޔާތަކަށް ބަދަލުކޮށްފި އެވެ.
ފިލިޕިންސްގެ ޑިޒާސްޓާ އޭޖެންސީން ބުނީ މިހާތަނަށް 14،023 މީހަކު އެވެކުއޭޝަން ސެންޓަރުތަކަށް ބަދަލުކޮށްފައިވާ ކަމަށެވެ.
ފިލިޕިންސްގެ ރަސްމީ ސްޕޯކްސް ޕާސަން ހެރީ ރޯކް ވިދާޅުވީ މިހާރު ކުރަމުންދާ ވިއްސާރައިގައި ވެރިރަށް މެނިލާގައި ފެންބޮޑުވެ ލިބިދާނެ ގެއްލުމަކަށް ސަމާލުވެ، އެކަމަށް ރައްކާތެރިވެ ތިބުމަށް ރައްޔިތުންނަށް އަންގާފައިވާ ކަމަށެވެ.
ދުނިޔޭގެ ބައެއް ހިސާބުތަކަށް މިދުވަސްވަރު ކުރަމުންދާ ވިއްސާރައިގައި ފިލިޕިންސްގެ އިތުރުން ޗައިނާ، އިންޑިއާ އަދި ހުޅަނގު ޔޫރަޕުގެ ގައުމުތަކަށްވެސް ދަނީ އަސަރު ކުރަމުންނެވެ. މީގެ އިތުރުން އުތުރު އެމެރިކާގެ ބައެއް ހިސާބުތަކަށްވެސް ދަނީ ބޯކޮށް ވާރޭ ވެހެމުންނެވެ. މިއީ މިހާރު ދުނިޔެއަށް އަންނަމުންދާ މޫސުމީ ބަދަލުތަކުގެ ސަބަބުން ކުރާ ވިއްސާރައެއް ކަމަށް ބެލެވެ އެވެ.
ސައުތު އީސްޓް އޭޝިޔާގެ 7،600 އެއްހާ ސަރަހައްދުގައި 20 ކޮޅިގަނޑެއް އުފެދިފައިވާ ކަމަށް މޫސުމީ އިދާރާތަކުން ބުނެ އެވެ. މި ކޮޅިގަނޑުތަކުގެ ސަބަބުން ބައެއް ސަރަހައްދުތަކަށް ދަނީ ބޯކޮށް ވާރޭ ވެހެމުންނެވެ.
ފިލިޕިންސްއަށް ކުރަމުންދާ ގަދަ ވިއްސާރައިގެ އަސަރު 13 މިލިއަނަށްވުރެއް ގިނަ މީހުންނަށް ކުރާނެ ކަމަށް ބެލެވެ އެވެ.
ވިއްސާރައިގެ ސަބަބުން ފިލިޕިންސްގެ ހާލަތު ގޯސްވެފައިވާއިރު މިހާރު ދުނިޔޭގައި ފެތުރެމުންދާ ބަލިމަޑުކަމުގެ ހާލަތުވެސް އެންމެ ގޯސް އޭޝިޔާގެ އެއް ގައުމަކީ ފިލިޕިންސް އެވެ. އެގައުމުން ކޮވިޑް-19 ގެ އިންޑިއާ ވޭރިއެންޓް (ޑެލްޓާ ވޭރިއެންޓް) ފެނި ފެތުރެމުންދާކަން ވަނީ ފާހަގަކުރެވިފަ އެވެ.
މިއަދު ހެނދުނުގެ ވަގުތެއްގައި ފިލިޕިންސްގެ މެޓްރޯ މެނިލާ ސަރަހައްދަށް 6.6 މެގްނެޑިއުޑުގެ ބާރުގަދަ ބިންހެލުމެއްވެސް ވަނީ އައިސްފަ އެވެ.
