އިންޑިއާގައި އުފެދުނު ކޮވިޑް-19 ގެ އެންމެ ނުރައްކާތެރި އެއް ވޭރިއެންޓު (ޑެލްޓާ ވޭރިއެންޓު) އެމެރިކާގައި ފެތުރެމުން ދާތީ ވެކްސިން ނުޖަހާ ފަރާތްތަކަށް ގުޅައި ވެކްސިން ޖަހަން އިލްތިމާސް ކުރަން ފަށަފައިފި އެވެ.
މިދިޔަ ހަފްތާގެ ތެރޭގައި އެމެރިކާގައި ވަނީ މާސްކު އެޅުމަކީ މަޖުބޫރު ނޫން ކަމެއްގެ ގޮތުގައި ކަނޑައަޅައިފަ އެވެ. އަދި ވިޔަފާރިތަކާއި، އާންމު ދަތުރުތައްވެސް ހުޅުވައިލަން ނިންމައިފަ އެވެ. ގާތްގަަނޑަކަށް އާންމު ހާލަތަށް އުސޫލުތައް ގެނަސްފައިވާއިރު މިކަމުގެ ސަބަބުން ކޮވިޑުގެ ބަލި މީހުން އިތުރުވާކަން ވަނީ ފާހަގަކުރެވިފަ އެވެ.
އެމެރިކާގެ ވެޓެރަންސް އެފެއާޒް ޑިޕާޓްމެންޓުން އިއްޔެ ބުނީ ޑޮކްޓަރުންނާއި ސިއްހީ ދާއިރާގައި މަސައްކަތްކުރާ މުވައްޒަފުން ކޮވިޑް ވެކްސިން ޖެހުން މަޖުބޫރު ކުރަން ނިންމާފައިވާ ކަމަށެވެ. އެގޮތަށް ނިންމީ ކޮވިޑް ކޮންޓްރޯލް ކުރުމުގެ ގޮތުން ކަމަށްވެސް އިއްޔެ ބޭއްވި ނޫސްވެރިނގެ ބައްދަލުވުމެއްގައި ވެޓެރަންސް ޑިޕާޓްމެންޓުން ވަނީ ބުނެފަ އެވެ.
އެމެރިކާގެ އެންމެ އާބާދީ ބޮޑު އެއް ސްޓޭޓު ކަމަށްވާ ކެލެފޯނިއާގައި އަންނަ އޯގަސްޓު މަހުން ފެށިގެން އާންމު ގިނަ ހިދުމަތްތަކެއް ހޯދަން ކޮވިޑް ވެކްސިނޭޝަން ކާޑު ބޭނުންވާނެ އެވެ. ކެލެފޯނިއާގެ ގަވަނާ ގެވިން ނިއުސަމް ވިދާޅުވީ ކޮންމެ ހަފްތާއަކު އެއްފަހަރު ބައްޗަށް ޓެސްޓު ކުރަންވެސް ޖެހޭނެ ކަަމަށެވެ. ޓެސްޓު ކުރަން ޖެހޭނީ ސިއްހީ ދާއިރާގެ މުވައްޒަފުންނެވެ.
އެމެރިކާގެ ވަކި ވަކި ސިއްހީ ހިދުމަތްދޭ އޭޖެންސީތަކުންވެސް ދަނީ ވެކްސިން ޖަހަން މަޖުބޫރު ކުރަމުންނެވެ. އެގޮތުން މިހާތަަނަށް 50 އަށްވުރެއް ގިނަ އޭޖެންސީން ވަނީ އެތަންތަނުގެ ހުރިހާ މުވައްޒަފުން ވެކްސިން ޖަހަން މަޖުބޫރުކޮށް ނޯޓިސް ނެރެފަ އެވެ.
އެމެރިކާގައި މިހާތަނަށް ވެކްސިން ދެވިފައިވަނީ އާބާދީގެ ގާތްގަނޑަކަށް 60 އިންސައްތަ އަށެވެ. މިހާރު ބައްޔަށް ޕޮޒިޓިވްވަމުންދާ ގިނަ އަދަދެއްގެ މީހުންނަކީ ވެކްސިން ނުޖަހާ މީހުންނެވެ. އެހެންކަމުން އެގައުމުގައި މިހާރު ހާލަތު ގޯސްވަމުންދަނީ ވެކްސިން ޖަހަން ބޭނުން ނުވެ ތިބި މީހުންގެ ސަބަބުންކަމަށް އެމެރިކާގެ ސިއްހީ ތަޖުރިބާކާރުން ވިދާޅުވެ އެވެ.
އެމެރިކާގައި 60 އިންސައްތަ ވެކްސިން ފުރިހަމަ ކުރިއިރު 68.8 އިންސައްތަ މީހުން ވަނީ ފުރަތަމަ ޑޯޒް ޖަހައިފަ އެވެ. ވެކްސިން ނުޖަހާ ބޮޑު އާބާދީއެއް އޮތީ ފްލޮރިޑާ، ޓެކްސަސް އަދި މިސޯރީގަ އެވެ. މިހާރު އެމެރިކާގައި ކޮވިޑަށް ޕޮޒިޓިވްވާ މީހުންގެ 40 އިންސައްތަ ހިއްސާ ކުރަނީ މި ތިން ސްޓޭޓުންނެވެ. އެގައުމުގައި 50 ސްޓޭޓު އޮވެ އެވެ.
