އަފްގާނިސްތާނުގެ އިރުމަތީ ޕްރޮވިންސެއް ކަމަށްވާ ނަރިސްތާނުގައި ފެންބޮޑުވުމުގެ ސަބަބުން މަރުވި މީހުންގެ އަދަދު 113 އަށް އަރައިފި އެވެ.
އަލްޖަޒީރާއިން ރިޕޯޓު ކުރާ ގޮތުގައި ފެން ބޮޑުވުމުގެ ހާދިސާގައި އެތައް ބަޔަކު ގެއްލި އަދިވެސް ނުފެނެ އެވެ.
ވެރިރަށް ކާބުލްގެ އުތުރުން 200 އެއްހާ ކިލޯ މީޓަރު ދުރުގައި އޮންނަ ނަރިސްތާންއަކީ ތޯލިބާނުން ކޮންޓްރޯލް ކުރާ ޕްރޮވިންސެކެވެ. އެތަނަށް ރެސްކިއު އޮޕަރޭޝަން ޓީމަށް މިއަދު ދެވޭނެ ކަމަށް ބެލެވޭއިރު ބޯކޮށް ވާރޭ ވެހުމާއި ގުޅިގެން ޓީމު އެސަރަހައްދަށް ފޯރުމުގައި ލަސްތަކެއް ވަނީ ކުރިމަތިވެފަ އެވެ.
އަފްގާނިސްތާނުގެ ނެޝަނަލް ޑިޒާސްޓާ މެނޭޖްމެންޓު އޮތޯރިޓީގެ ތަރުޖަމާނު އަބްދުލް ސަމާއީ ޒަރްބީ ވިދާޅުވީ އެންމެ މަދުވެގެން 170 ގެ ބޭނުން ނުކުރެވޭ ވަރަށް ހަލާކުވެަފއިވާ ކަމަށެވެ. އެންމެ މަދުވެގެން 300 އާއިލާއަށް މިކަމުގެ އަސަރު ކުރާނެ ކަމަށް ބެލެވޭ ކަމަށްވެސް އޭނާ ވިދާޅުވި އެވެ.
މި ހާދިސާގައި އެކިވަރުގެ ގެއްލުން ލިބިގެން 34 މީހަކަށް މިހާތަނަށް ވަނީ ފަރުވާ ދީފަ އެވެ. ޑިޒާސްޓާ މެނޭޖްމެންޓަށް ކަނޑައަޅާފައިވާ ސްޓޭޓް މިނިސްޓްރީގެ ތަރުޖަމާނު ތަމީމް އަޒީމީ ވިދާޅުވީ ތޯލިބާނުންގެ ކޮންޓްރޯލުގެ ދަށުގައި ނަރިސްތާނު އޮތުމުން އެތަނަށް އެންމެ އެކަށީގެންވާ ވަރަށް އެހީތެރިކަން ފޯރުކޮށްދެވިފައި ނުވާކަމަށެވެ. އެހެންނަމަވެސް ރިޕޯޓުތައް ބުނާ ގޮތުން އދ. އިންވެސް ދަނީ ހާލުގައި ޖެހުނު މީހުންނަށް އެހީވާން މަސައްކަތް ކުރަމުންނެވެ. އެގޮތުން ސާފު ބޯފެން ފޯރުކޮށްދޭން އެ ޖަމިއްޔާއިން އަންނަނީ މަސައކްަތް ކުރަމުންނެވެ.
ފެން ބޮޑުވުމުގެ ސަބަބުން ނަރިސްތާނުގައި ހުންނަ ބްރިޖެއްވެސް ވަނީ ހަލާކުވެފަ އެވެ.
މިދިޔަ އަހަރުގެ އޮގަސްޓު މަހުގެ ތެރޭގައިވެސް ބޯކޮށް ވާރޭ ވެހުމާއި ގުޅިގެން އަފްގާނިސްތާނުގައި ފެން ބޮޑުވި އެވެ. އެގޮތުން އެހާދިސާގައި 150 އަށްވުރެއް ގިނަ މީހުން މަރުވި އެވެ. މިދިޔަ އަހަރު ފެން ބޮޑުވެގެން އަފްގާނިސްތާނުގެ 13 ޕްރޮވިންސަކަށް އަސަރު ކުރި އެވެ.
