ސްރީލަންކާގެ ކުރީގެ ރައީސް މައިތްރިޕާލަ ސިރިސޭނާ 2024 ވަނަ އަހަރު އޮންނަ ރިޔާސީ އިންތިހާބުގައި ވާދަކުރަން ސްރީލަންކާ ފްރީޑަމް ޕާޓީ (އެސްއެލްއެފްޕީ) އިން ހުށަހަޅައިފި އެވެ.
މީޑިއާ ރިޕޯޓުތައް ބުނާ ގޮތުން ސިރިސޭނާއަށް މި ހުށަހެޅުން އަރުވާފައިވަނީ މިދިޔަ ޖުލައި މަހުގެ 29 ވަނަ ދުވަހު ބޭއްވި އެސްއެލްއެފްޕީގެ ބައްދަލުވުމެއްގަ އެވެ. އެޕާޓީގެ ކޮމިޓީ މެމްބަރު ތިސަރާ ގުގަސިންގޭ ވަނީ އެކަން މީޑިއާތަކަށް ކަށަވަރުކޮށްދީފަ އެވެ.
އެސްއެލްއެފްޕީގެ ހުށަހެޅުމަށް ސިރިސޭނާ ރަސްމީ ޖަވާބެއް އަދި ނުދެއްވަ އެވެ.
ސިރިސޭނާ ސްރީލަންކާގެ ރައީސްކަމަށް އިންތިހާބުވީ އެގައުމުގެ އަށްވަނަ ރިޔާސީ އިންތިހާބުގައި 2015 ވަނަ އަހަރު އެވެ. އޭނާ އެ އިންތިހާބަށް ނިކުންނެވީ އޭރުގެ ހުރިހާ އިދިކޮޅު ޕާޓީއެއްގެ ތާއީދު ލިބިގެން ކޯލިޝަނެއްގެ ތެރެއިންނެވެ.
އޭގެ ފަހުން 2019 ވަނަ އަހަރުގެ ރިޔާސީ އިންތިހާބުގައި ސިރިސޭނާއާއި އޭނާގެ ޕާޓީ އެސްއެލްއެފްޕީއިން ތާއީދު ކުރީ މިހާރުގެ ރައީސް ގޯތަބަޔާ ރަޖަޕަކްސައަށެވެ.
ދެން އެންމެ އަވަހަށް އޮންނަ ސްރީލަންކާގެ ރިޔާސީ އިންތިހާބުގައި ސިރިސޭނާ ވާދަކުރައްވަން އޭނާގެ ޕާޓިން ހުށަހެޅިއިރު ސިރިސޭނާގެ މައްޗަށް އެގައުމުގެ ރިޔާސީ ކޮމިޝަނަކުން ދަނީ ތަހުގީގެއް ހިންގަމުންނެވެ. އެއީ ސިރިސޭނާގެ ވެރިކަމުގައި ހިންގި ބޮން ގޮއްވުމުގެ ޓެރަރިސްޓު ހަަމަލާތަކެއް ހުއްޓުވުމުގައި އިހުމާލުވިކަމަށް ކުރެވޭ ތުހުމަތުތަކަކާއި ގުޅިގެން ހިންގާ ޖިނާއީ ތަހުގީގެކެވެ.
ރާޖަޕަކްސަގެ ކެބިނެޓުން ސިރިސޭނާއަށް ސްލޮޓެއް ދޭން އުޅޭކަމަށްވެސް މި އަހަރުގެ ތެރޭގައި އަޑު ފެތުރުނެވެ. އެހެންނަމަވެސް މިދިޔަ ޖޫން މަހުގެ ތެރޭގައި ސިރިސޭނާ ވަނީ އެކަން ދޮގުކޮށްފަ އެވެ.
