އިއްޔެވެސް އިންޑިއާއިން 91،702 މީހުން ކޮވިޑް-19 އަށް ޕޮޒިޓިވްވެއްޖެ އެވެ.
ވޭތުވެދިޔަ ހަތަރު ދުވަހު އިންޑިއާގައި ދުވާލަކަށް ޕޮޒިޓިވްވާ މީހުންގެ އަދަދު ވަނީ ކޮންމެވެސް ވަރަކަށް މަދުވެފަ އެވެ. އެގޮތުން މިދިޔަ ހޯމަ ދުވަހާއި ހަމައަށް ޕޮޒިޓިވްވާ ރޭޓު ހުރީ ފަސް އިންސައްތައަށްވުރެއް މަތީގަ އެވެ. އެހެންނަމަވެސް އަންގާރަ ދުވަހުން ފެށިގެން އިއްޔެ އާއި ހަމައަށް މިރޭޓު ވަނީ 4.48 އަށް ވެއްޓިފަ އެވެ.
އިއްޔެ އިންޑިއާގައި ކޮވިޑު ޖެހިގެން މަރުވީ 3،403 މީހުންނެވެ. މިއީ ރެކޯޑު ކުރެވުނު އަދަދުތަކެވެ. ބައެއް ފަގީރު ހިސާބުތަކުގައި ކޮވިޑުގައި މީހުން މަރުވާއިރު އެމީހުން ކޮވިޑު އަދަދުތަކުގެ ތެރެއަށް ރިޕޯޓު ކުރަނީ ދެތިން ދުވަސް ފަހުންނެވެ.
އިންޑިއާގައި އިއްޔެ އެކަނިވެސް ވަނީ 3.2 މިލިއަން މީހުންނަށް ކޮވިޑް ދިފާއު ވެކްސިން ދީފަ އެވެ. މިއާއެކު މިހާތަނަށް ވެކްސިން ދިން މީހުންގެ އަދަދު ވަނީ 246.1 މިލިއަނަށް އަރައިފަ އެވެ.
ވެކްސިން ޕްރޮގުރާމުގެ ތެރެއިން އެކި ސްޓޭޓުތަކުގައި ވެކްސިން ދެވެނީ އެކި މިންވަރަށެވެ. އެގޮތުން ތަމިލް ނާޑޫ، ޔޫޕީ، އައްސާމް، ބިހާރް ގެ އިތުރުން ޖާކަންޑްގައި ވެކްސިން ދެވޭ މީހުންގެ އަދަދު އިންތިހާއަށް މަދެވެ. ބައެއް ހިސާބުތަކުގައި 7 މިލިއަނަށްވުރެއް ގިނަ މީހުން އުޅޭއިރު އާބާދީގެ ނުވަ އިންސައްތައަށްވެސް ވެކްސިން ނުދެވެ އެވެ.
އެގައުމުގެ ސަރުކާރުން މަސައްކަތް ކުރަނީ އެންމެ ބޮޑެތި އާބާދީތައް އޮންނަ ތަރައްގީ ހިސާބުތަކުގައި ވެކްސިން ދިނުން އަވަސްކުރުމަށެވެ. އޭގެ ތެރޭގައި ދިއްލީ އާއި މުމްބާއީގެ ސްޓޭޓުތައް ހިމެނެ އެވެ. މިތަންތަނުގައި ލޮކްޑައުން އިއުލާންކުރުމުގެ ސަބަބުން ވޭތުވެދިޔަ މަހެއްހާ ދުވަހުގެ ތެރޭގައި އިގްތިސޯދަށް ވަނީ ނޭދެވޭ އަސަރުތަކެއް ކޮށްފަ އެވެ.
+1
+1
+1
+1
+1
+1
