މާދަމާ ތާޖް މަހަލް ހުޅުވާލަނީ

ކޮވިޑް-19 ގެ ދެވަނަ ރާޅެއް އިންޑިއާގައި ނަގައި މުޅި ގައުމު ބަންދުކޮށްފައި އޮތުމަށްފަހު ލުއިތަކެއް ދެމުން ދާއިރު ތާޖް މަހަލް މާދަމާ ހުޅުވާލަން ނިންމައިފި އެވެ.
ތާޖް މަހަލް ހިމެނޭހެން އިންޑިއާގެ ވަރަށް ގިނަ މޮނިއުމެންޓުތައް ބަންދު ކުރިތާ މިހާރު ވަނީ ދެމަސްދުވަސް ވެފަ އެވެ. ގިނަ ސަރަހައްދުތަކެއްގައި އެޅި ރައްކާތެރިކަމުގެ ފިޔަވަޅުތަކާއިއެކު އެއްވެސް މޮނިއުމެންޓަކަށް ނުވަތަ އާސާރީ ސަރަހައްދަކަށް ޒިޔާރާތް ކުރުން އިންޑިއާގައި މަނާކުރި އެވެ.
އިންޑިއާގެ އާކިއެލޮޖިކަލް ސާވޭ (އޭއެސްއައި) އިން ބުނީ މާދަމާއިން ފެށިގެން ތާޖް މެހެލްއަށް ޒިޔާރާތް ކުރަން ބޭނުންވާ ފަރާތްތަކަށް ޓިކެޓު ދޫކުރަމުން ދާނެ ކަމަށެވެ. ތާޖް މަހަލްގެ އިތުރުންވެސް އެހެނިހެން ބައެއް މޮނިއުމެންޓުތަކަށްވެސް މާދަމާއިން ފެށިގެން ޒިޔާރާތް ކުރެވޭނެ އެވެ. އޭގެ ތެރޭގައި ރެޑް ފޯޓް އާއި އަޖާންޓާ ކޭވްސް ވެސް ހިމެނެ އެވެ. މީގެ އިތުރުންވެސް 3،691 މޮނިއުމެންޓެއް ހިމެނެ އެވެ.
މި މޮނިއުމެންޓުތަކަށް ޒިޔާރާތް ކުރާ މީހުން ރައްކާތެރިކަމުގެ ފިޔަވަޅުތަކަށް ބޯލަނބަން މަޖުބޫރު ވާނެ އެވެ. އެގޮތުން ގައިދުރު ކުރުމާއި މާސްކު އެޅުންފަދަ ކަންކަން އެމީހުންނަށް މަޖުބޫރު ކުރާނެ އެވެ.
ތާޖް މެހެލް ހިމެނޭހެން ރެޑް ފޯޓްއާއި އަޖާންޓާ ކޭވްސްއަށް އަހަރަކު 80 ލައްކައެއްހާ މީހުން ޒިޔާރާތް ކުރެ އެވެ. އެއީ އިންޑިއާގެ ފަތުރުވެރިކަމުގެ ސިނާއަތުގައި މުހިންމު ދައުރެއް އަދާކުރާ ތަންތަނެވެ.
މީގެ ކުރިން ދުވާލެއްގެ މައްޗަށް ގާތްގަނޑަކަށް 20 ހާހަށްވުރެއް ގިނަ މީހުން މިތަންތަނަށް ޒިޔާރާތް ކުރެ އެވެ. ތާޖް މެހެލްއާއި އެނޫންވެސް މޮނިއުމެންޓުތައް މާދަމާ ހުޅުވާއިރު އެތަންތަނަށް މީހުންނަށް ޒިޔާރާތް ކުރެވޭނީ ވަކި އަދަދަކަށެވެ. އެގޮތުން ބޮޑެތި ތަންތަނަށް 5،000 މީހުންނަށް ދެވޭގޮތަށް އުސޫލު އެކުލަވައިލިއިރު ބައެއް ކުދި ތަންތަނަށް ދުވާލަކަށް ޒިޔާރާތް ކުރެވޭނީ 1،500 މީހުންނަށެވެ.
މި ދުވަސްވަރަކީ ކޮވިޑުގެ ސަބަބުން އިންޑިއާގެ ހާލަތު ވަރަށް ބޮޑަށް ގޯސްވެފައިވާ ދުވަސްވަރެއްކަމުން އެގައުމުން ބޭރުގެ ފަތުރުވެރިން މިދުވަސްވަރު އެއްވެސް ވަރަކަށް ޒިޔާރާތެއް ނުކުރެ އެވެ.