ރިސޯޓުތައް ކުއްޔަށް ދޫކުރާ މުއްދަތު އިތުރުކުރުމަށް ކުރިން ދައްކަން ޖެހޭ އަގަށް ވުރެ ދެ ގުނަ ކުޑަ ވާނެ ގޮތަށް ސަރުކާރުގެ ފަރާތުން މިދިޔަ ހަފުތާގައި ޓޫރިޒަމް ގާނޫނަށް ހުށަހެޅި އިސްލާހު، ރައީސް ޑރ. މުހައްމަދު މުއިއްޒު ތަސްދީގު ކުރައްވައިފި އެވެ.
މި ބިލަކީ މި މަހުގެ 19 ގައި ބޭއްވި މަޖިލީހުގެ ޖަލްސާއިން ފާސްކުރި ބިލެކެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ޑިސެމްބަރު 27، 2020 ގައި ގެނައި އިސްލާހާ އެކު ކުޑަ ކުލި ދައްކައިގެން މުއްދަތު އިތުރު ކުރެވޭ ގޮތަށް ހެދި އެވެ.
ޓޫރިޒަމް ގާނޫނުުގައިވާ ގޮތުން، ރިސޯޓު ނުވަތަ އިންޓަގްރޭޓަޑް ރިސޯޓު ހަދަން ރަށް ނުވަތަ ބިން ކުއްޔަށް ދޫކުރެވެނީ ގިނަވެގެން 50 އަހަރަށެވެ. އަދި ވަކި ޝަރުތުތަކެއް ފުރިހަމަވާ ނަަމަ، އެ މުއްދަތު 49 އަހަރަށް އަނެއްކާ ވެސް އިތުރު ކުރެވެ އެވެ.
ފުރަތަމަ ދެ އަހަރު ދުވަހުގެ ތެރޭގައި މުއްދަތު އިތުރު ކުރުމުގެ ފީއެއްގެ ގޮތުގައި 5،000،000 ޑޮލަރު އެކީ އެއްފަހަރާ ދެއްކުމަށް އޮތް މާއްދާއަށް ވެސް ވަނީ އިސްލާހު ގެނެސްފަ އެވެ. އެގޮތުން ހަ މަސް ތެރޭގައި ފަސް މިލިއަން ޑޮލަރު އެކީ އެއްފަހަރާ ދެއްކުމަށާއި އޭގެ ފަހުން ދައްކާނަމަ މުއްދަތު އިތުރު ކުރުމުގެ ފީއެއްގެ ގޮތުގައި 10 މިލިއަން ޑޮލަރު އެއްފަހަރާ ދައްކާ ގޮތަށް ވަނީ ބަދަލުކޮށްފަ އެވެ.
ޓޫރިޒަމާ ބެހޭ ގާނޫނަށް 13 ވަނަ އިސްލާހު ގެނައުމުގެ ބިލު ރައީސް މިއަދު ތަސްދީގުކުރެއްވުމާ ގުޅިގެން މި ގާނޫނު މިއަދު ވަނީ ދިވެހި ސަރުކާރުގެ ގެޒެޓުގައި ޝާއިއު ކުރައްވައިފަ އެވެ. މި ގާނޫނަށް އަމަލުކުރަން ފެށުމަށް ހަމަޖެހިފައި ވަނީ މި ގާނޫނު ތަސްދީގުކޮށް، ސަރުކާރުގެ ގެޒެޓުގައި ޝާއިއުކުރާ ދުވަހުން ފެށިގެންނެވެ.
އެހެން ކަމުން އަންނަ އަހަރުގެ ފެބްރުއަރީ 29 ގެ ނިޔަލަށް ރިސޯޓުތަކުގެ މުއްދަތު އިތުރު ކުރުމަށް ހުށަހަޅާ ހުށެހެޅުންތަކަށް މި ލުއިތައް ލިބޭނެ އެވެ.
