އިންޑޮނޭޝިއާގެ ހަލްމަހޭރާގައި އޮންނަ އަލިފާން ފަރުބަދަ, "މައުންޓް އީބޫ" ގޮވަން ފެށުމާ ގުޅިގެން, އެ ފަރުބަދަ ކައިރި ހަތް ސަރަހައްދެއްގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް ފަށައިފިއެވެ.
އިންޑޮނޭޝިއާގެ ކާރިސާތަކާ ބެހޭ އިދާރާގެ އިސް އޮފިޝަލެއް ކަމުގައިވާ ޢަބްދުލް މުހާރީ ވިދާޅުވީ އެ ފަރުބަދަ ވަށައިގެންވާ ހިސާބުތަކުން މީހުން ނެރުމަށް އިންޑޮނޭޝިއާގެ ފުލުހުންނާއި އަސްކަރިއްޔާގެ އިތުރުން ކުއްލި ހާލަތްތަކުގައި ހަރަކާތްތެރިވާ ޓީމުތަކުން ބައިވެރިވަމުންދާ ކަމަށެވެ.
އިންޑޮނޭޝިއާގެ އަލިފާން ފަރުބަދަތަކާ ބެހޭ އިދާރާއިން ބުނީ, "މައުންޓް އިބޫ" ގޮވަން ފަށާފައިވަނީ މޭ 18ވަނަ ދުވަހުން ފެށިގެންނެވެ. އެ ގޮވުމާ އެކު ދިޔާ އަލިފާނާއި އަޅި ފައިބަން ފަށައިފައިވާ ކަމަށް ވެސް އެ އިދާރާއިން ބުނެއެވެ.
އަލިފާން ފަރުބަދަ ގޮވަން ފެށުމާ އެކު ހަތަރު ކިލޯމީޓަރު މައްޗަށް އަޅިޔާއި ދުން އަރަމުންދާ ކަމުގައި ވެސް އެ އިދާރާއިން ބުންޏެވެ. އެ ސަރަހައްދުގެ މޫސުން ވެސް މިހާރު ވަނީ ވަރަށް ބޮޑަށް ގޯސްވެފައެވެ.
އެހިސާބުތަކުން ހުސްކުރަނީ ކިހާ މީހުންނެއް ކަމެއް އިންޑޮނޭޝިއާގެ ޑިޒާސްޓަރ އެޖެންސީއިން ހާމަކޮށްފައި ނުވި ނަމަވެސް "މައުންޓް އިބޫ" ކައިރިން ހަތް ކިލޯ މީޓަރުގެ ރޭޑިއަސް އެއް ސާފުކުރުމަށް އެ އެޖެންސީއިން ވަނީ ލަފާ ދީފަ އެވެ. ހަލްމަހޭރާގައި ގާތްގަނޑަކަށް ހަތްލައްކަ މީހުން ދިރިއުޅެ އެވެ.
އިންޑޮނީޝިޔާއަކީ އަލިފާން ފަރުބަދަތައް ގިނަ 'ޕެސިފިކް ރިންގް އޮފް ފަޔާ'ގެ ނަން ދީފައިވާ ސަރަހައްދުގައި އޮންނަ ގައުމެކެވެ. އެ ސަރަހައްދުގައި 127 އަލިފާން ފަރުބަދަ ހުރެއެވެ.
