ހުޅުމާލެ ހޮސްޕިޓަލްގެ ޚިދުމަތުގެ ފެންވަރު މަތިކޮށް އިތުރު ހޮސްޕިޓަލެއް ގާއިމުކުރަންޖެހޭ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އާންމުންނަށް ރައީސް މުއިއްޒާ ސުވާލު ކުރެވޭ ގޮތަށް ކުރިއަށް ގެންދާ 'ރައީސްގެ ޖަވާބު'ގެ މިއަދުގެ ޕްރޮގްރާމްގައި ހުލުމާލެ ފްލެޓް 51503، މުޙައްމަދު ރިއާޒް ވަނީ ހުޅުމާލެ ހޮސްޕިޓަލުން އެކަށީގެންވާ މިންވަރަށް ޚިދުމަތް ފޯރުކޮށްނުދެވޭތީ އެކަމާ ކަންބޮޑުވުން ފާޅުކޮށްފައެވެ.
"ހުޅުމާލެ ހޮސްޕިޓަލް ހުރީ ކުރިން ވެސް ހުރި ހާލަތުގައި. މުޅި ޖުމްލަ ހުޅުމާލޭގެ އާބާދީގައި ގާތްގަނޑަކަށް އެއް ލައްކައެއްހައި މީހުން އުޅޭނެ ކަމަށް ބެލެވޭ. ނަމަވެސް ހުޅުމާލެ ހޮސްޕިޓަލުން އެތެރެ ހަށީގެ މީހަކަށް ދައްކާލަން ގުޅީމައި 500 ނުވަތަ 800 މީހުންގެ ކިޔުއަކަށްދާ މައްސަލަގައި ކޮބައިތޯ ރައީސްގެ ހިޔާލުފުޅަކީ،" ރިޔާޒް، ރައީސް އަރިހުން އެއްސެވިއެވެ.
މި ކަންބޮޑުވުންތަކަށް ޖަވާބުދެއްވަމުން ރައީސް ވިދާޅުވީ، މާލެ ސިޓީ ސަރައްހައްދުގެ ސިއްޚީ ނިޒާމު ވަރުގަދަ ކުރުމަކީ ސަރުކާރުން ވަރަށް އިސްކަންދޭ ކަމެއް ކަމަށެވެ.
