ރޯދަ މަހުގެ ފުރަތަމަ 20 ދުވަހާއި ޝައްވާލުމަހުގެ ހަ ރޯދައިގައި އިމިގްރޭޝަނުގެ ޚިދުމަތް ދޭ ގަޑިތައް އާންމުކޮށްފިއެވެ.
އިމިގްރޭޝަނުން އިއްޔެ ކުރި އިއުލާނެއްގައި ވަނީ ރޯދަ މަހުގެ ފުރަތަމަ 20 ދުވަހާއި ޝައްވާލުމަހުގެ ހަ ރޯދައިގައި އިމުގާ މެދުވެރިކޮށް ޕާސްޕޯޓަށް އެދި 24 ގަޑިއިރު އެޕްލިކޭޝަން ހުށަހެޅޭނެ ކަމަށެވެ.
އުމުރުން 65 އަހަރުން މަތިވެފައިވާ ފަރާތްތަކާއި ހާއްސަ އެހީއަށް ބޭނުންވާ ފަރާތްތަކުގެ ތެރެއިން ޕާސްޕޯޓު ޚިދުމަތަށް އެހީ ބޭނުންވާ ފަރާތްތަކުގެ ފޯމް ހެނދުނު 9:00 އިން ހަވީރު 16:00 ގެ ނިޔަލަށް ބަލައިގަންނާނެ އެވެ. ޕާސްޕޯޓު ނެގުމަށް މާލެއިން ނަންބަރު ދޫކުރާނީ ހެނދުނު 9:00 އިން މެންދުރު 13:00 އަށެވެ. ރީޖަނަލް އޮފީސްތަކުން ޕާސްޕޯޓު ދޫކުރުމަށް ހަމަޖެހިފައިވަނީ ހެނދުނު 9:05 އިން މެންދުރު 12:00 އާ ހަމައަށެވެ.
ވިސާއާ ގުޅޭ ޚިދުމަތްތައް ފޯރުކޮށްދޭނީ ކަނޑައަޅާފައިވާ ވަކި ގަޑިތަކުގައި ކަމަށް އިމިގްރޭޝަންގެ އިއުލާނުގައިވެއެވެ.
ވިސާއާ ގުޅޭ ޚިދުމަތްތައް ފޯރުކޮށްދޭ ގަޑިތައް:
- އިމުގާ އަދި އެކްސްޕެޓް ސިސްޓަމް މެދުވެރިކޮށް އޮންލައިން އެޕްލިކޭޝަން ހުށަހެޅުން - ހެނދުނު 9:00 އިން ހަވީރު 17:00 އަށް
- އެޕޮއިންޓްމަންޓު އުސޫލުން ވާކްވިސާއަށް އެދި ޕާސްޕޯޓު ހުށަހެޅުން - ހެނދުނު 9:00 އިން 10:45 އަށް
- އެޕޮއިންޓްމަންޓު އުސޫލުން ވާކްވިސާއަށް އެދި ހުށަހަޅާފައިވާ ޕާސްޕޯޓު ދޫކުރުން - ހެނދުނު 11:00 އިން މެންދުރު 12:30އަށް
- އެޕޮއިންޓްމަންޓު އުސޫލުން ވޯކް ވިސާ ފިޔަވައި އެހެނިހެން ވިސާއަށް އެދި ޕާސްޕޯޓު ބަލައިގަނެ، ވިސާ ޖަހައިދިނުން - ހެނދުނު 9:05 އިން މެންދުރު 12:00އަށް
- ވޯކްވިސާ ޚިދުމަތާއި ގުޅޭ މައުލޫމާތު އޮޅުންފިލުއްވުމަށް (ގުޅުއްވާނީ 9199153) - ހެނދުނު 9:05 އިން މެންދުރު 13:00 އަށް
- ވިސާގެ ޚިދުމަތާއި ގުޅޭ އެހެނިހެން މައުލޫމާތު ސާފުކުރުމަށް ( ގުޅުއްވާނީ 9199157) - ހެނދުނު 9:05 އިން މެންދުރު 13:00އަށް
ރޯދަ މަހުގެ ފަހު 10ގައި ވެސް 24 ގަޑިއިރު އެޕްލިކޭޝަން ހުށަހެޅުމުގެ ފުރުސަތު އޮންނާނެ އެވެ. އުމުރުން 65 އަހަރުން މަތިވެފައިވާ ފަރާތްތަކާއި ހާއްސަ އެހީއަށް ބޭނުންވާ ފަރާތްތަކުގެ ތެރެއިން ޕާސްޕޯޓު ޚިދުމަތަށް އެހީ ބޭނުންވާ ފަރާތްތަކުގެ ފޯމް ބަލައިގަތުން އޮންނާނީ ހެނދުނު 9:00 އިން ހަވީރު 13:00 އަށެވެ.
ޕާސްޕޯޓު ނެގުމަށް މާލެއިން ނަންބަރު ދޫކުރާނީ ހެނދުނު 9:00 އިން މެންދުރު 12:00 އަށެވެ. އަދި މާލޭގައި ހެނދުނު 9:00އިން 17:00އަށް ޕާސްޕޯޓު ދޫކުރުން ކުރިއަށްދާނެއެވެ.
