އެކި މައްސަލަތަކާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައިވާ 103 ކިލޯއަށް ވުރެ ގިނަ މަސްތުވާތަކެތި މިއަދު ނައްތާލައިފިއެވެ.
މިކަމާ ގުޅިގެން މައުލޫމާތު ދެމުން ފުލުހުން ބުނީ މިއަދު ނައްތާލައިފައިވަނީ 958 މައްސަލައާއި 197 އިންސިޑެންޓުގައި ހިމެނޭ 3121 އެވިޑެންސް ކަމަށެވެ.
މަސްތުވާތަކެތި ނައްތާލުމަށް ބޭއްވި މި ހާއްސަ ހަރަކާތް ކުރިއަށް ގެންގޮސްފައިވަނީ ދޫނިދޫގައެވެ.
މިއަދު ނައްތާލި މަސްތުވާތަކެތީގެ ތެރޭގައި ހިމެނެނީ:
- 8293 ރަބަރު ޕެކެޓު
- 2731 ސެލޯފިންކޮޅު
- ފިލްމުހުސްކުރި 237 ދަޅު
- 585 ބުލެޓު
- 30 ބިޑި
- 537 މަނާ ބޭސްގުޅަ
- އެހެނިހެން ތަކެތީގެ ގޮތުގައި 3045 އައިޓަމް
ފުލުހުން ބުނީ މި ތަކެތީގެ އަގުމަގު ކުރާއިރު މަގުމަތީ އަގު 425 މިލިއަން ރުފިޔާއަށް އަރާ ކަމަށެވެ.
މަސްތުވާ ނައްތާލުމުގައި ގެންގުޅޭ އުސޫލުތަކަށް ގެނައި ބަދަލުތަކާއެކު، މައްސަލަތަކުގައި ފުލުހުންގެ ބެލުމުގެ ދަށަށް ގެންދާ މަސްތުވާތަކެތީގެ ތެރެއިން އެ މައްސަލައެއް ތަހުގީގު ކުރުމަށް ގާނޫނީގޮތުން ބެހެއްޓުމަށް ލާޒިމުކުރާ މިންވަރަށް ބެހެއްޓުމަށްފަހު ބާކީ ހުންނަ ތަކެތި ވީ އެންމެ އަވަހަކަށް ނައްތާލާނެ ކަމަށް އެ އިދާރާއިން ވަނީ ބުނެފައެވެ.
މި ތަކެތި ނައްތާލައިފައިވަނީ، ފުލުހުންގެ ބެލުމުގެ ދަށަށް ގެނެވޭ މަސްތުވާތަކެއްޗާއި މަސްތުވާތަކެތީގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވާއިދުގެ ދަށުން އެކަމަށް އެކުލަވައިލާފައިވާ ކޮމިޓީގެ ބެލުމުގެ ދަށުންނެވެ.
