ޖުޑީޝަލް ސަރވިސް ކޮމިޝަން (ޖޭއެސްސީގެ) ނައިބްރައީސަކަށް ފަނޑިޔާރު މުޙައްމަދު ނިޔާޒު އިންތިޚާބު ކޮށްފިއެވެ.
ފަނޑިޔާރު ނިޔާޒަކީ ހައިކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިޚާބުކުރާ ފަނޑިޔާރެއްގެ ހައިސިއްޔަތުން ޖޭއެސްސީގައި ހައިކޯޓު ތަމްސީލު ކުރައްވާ ފަރާތެވެ.
މީގެ ކުރިން ޖޭއެސްސީގެ ނައިބްރައީސްގެ މަޤާމުގައި ހުންނެވީ ސުޕްރީމް ކޯޓުގެ ފަނޑިޔާރު އައިޝާ ޝުޖޫން މުޙައްމަދެވެ. ނަމަވެސް ފަނޑިޔާރު ޝުޖޫންގެ ބަދަލުގައި ޖުޑީޝަލް ސަރވިސް ކޮމިޝަނުގައި ސުޕްރީމް ކޯޓު ތަމްސީލު ކުރެއްވުމަށް ފަނޑިޔާރު ޙުސްނުއްސުޢޫދު ހަމަޖައްސަވަން ސުޕްރީމް ކޯޓުގެ ފަނޑިޔާރުންގެ މަޖިލީހުން ވަނީ ނިންމާފައެވެ.
އެއާއެކު ޖޭއެސްސީގެ ނައިބްރައީސްގެ މަޤާމު ހުސްވުމާއެކު ޖޭއެސްސީގެ މެމްބަރުންގެ މެދުގައި ނެގުނު ވޯޓުން ނިންމާފައިވަނީ އެ މަޤާމަށް ފަނޑިޔާރު ނިޔާޒު އިންތިޚާބު ކުރެއްވުމަށެވެ.
ފަނޑިޔާރު މުޙައްމަދު ނިޔާޒު މަތީތަޢުލީމު ހާސިލުކުރެއްވީ ޝަރީޢަތާއި ޤާނޫނުގެ ރޮނގުން މޭލޭޝިއާގެ އިންޓަރނޭޝަނަލް އިސްލާމިކް ޔުނިވަރސިޓީންނެވެ.
މުޙައްމަދު ނިޔާޒު ކުރިން ފުރުއްވާފައިވާ މަޤާމުތަކުގެ ތެރޭގައި ހދ. ޖުޑީޝަލް ދާއިރާގެ އިސް މެޖިސްޓްރޭޓްކަމާއި ހދ. ވައިކަރަދޫ ކޯޓުގެ މެޖިސްޓްރޭޓްކަން ހިމެނެއެވެ.
ޖޭއެސްސީގައި ރައީސުލްޖުމްހޫރިއްޔާ އައްޔަންކުރައްވާ މެންބަރަކާއި، ރައްޔިތުންގެ މަޖިލީހުގެ ރައީސާއި، ސިވިލް ސާވިސް ކޮމިޝަން (ސީއެސްސީ) ގެ ރައީސާއި، ރައްޔިތުންގެ މަޖިލީހުން ކަނޑައަޅާ އެ މަޖިލީހުގެ މެންބަރަކާއި، މަޖިލީހުން ކަނޑައަޅާ އާންމުންގެ މީހެއްގެ އިތުރުން އުއްތަމަ ފަނޑިޔާރާއި، ސުޕްރީމް ކޯޓުން ކަނޑައަޅާ ފަނޑިޔާރެއްވެސް އިންނަވާނެއެވެ. އަދި ހައި ކޯޓުން އިންތިހާބުކުރާ އެ ކޯޓުގެ ފަނޑިޔާރަކާއި، ދަށު ކޯޓުތަކުން އިންތިހާބުކުރާ ދަށު ކޯޓެއްގެ ފަނޑިޔާރެއްވެސް ޖޭއެސްސީގައި ތިއްބަވައެވެ. ގާނޫނީ ވަކީލުންގެ ތެރެއިން އިންތިހާބު ކުރާ ވަކީލެއްގެ އިތުރުން ދައުލަތުގެ ބަންޑާރަ ނައިބު ވެސް އިންނަވަ އެވެ.
