ރާއްޖޭގައި އެންމެ ބޮޑަށް ނަފުރަތު އުފެދޭގޮތަށް ވާހަކަ ދައްކަނީ އެމްޑީޕީން ކަމަށާއި އެމްޑީޕީގެ ބޭފުޅުން އިސްލާހުވަނިކޮށް ގައުމު އިސްލާހު ވެދާނެ ކަމަށް ކުރީގެ އިސްލާމިކް މިނިސްޓަރު އަދި މަޝްހޫރު ދީނީ އިލްމުވެރިޔާ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ޝަހީމް މިފަދައިން ވިދާޅުވީ އުނގޫފާރު ދާއިރާގެ ރައްޔިތުންގެ މަޖިލީހުގެ މެމްބަރު މުހައްމަދު ވަހީދު (ވައްޑޭ)، ޝަހީމް އާއި ގުޅުވައި މިއަދު ދެއްކެވި ވާހަކަތަކަކަށް ރައްދު ދެއްވަމުންނެވެ. އެގޮތުން ޑރ. ޝަހީމް ވިދާޅުވީ 2010 ވަނަ އަހަރު އޭނާއަކީ ޓެރަރިސްޓެއްގެ ގޮތުގައި ރައީސް އޮފީހުގެ ވެބްސައިޓުގައި ނަން އާންމު ކުރި ކަމަށެވެ. އޭރު ރައީސަކަށް ހުންނެވީ އެމްޑީޕީގެ ރައީސް މުހައްމަދު ނަޝީދު އެވެ.
ޝަހީމް ވިދާޅުވީ އޭނާގެ ބޮލުގައި ބަދު އަހުލާގީ ތުހުމަތުތަކެއް އަޅުވައި، އެމްޑީޕީގެ މަސްލަހަތު އޮންނަ ރާއްޖެ ޓީވީން އަބުރު ކަތިލައި އޭނާއާއި އާއިލާއާއި ދަރިންނަށް އެއްވެސް ހައްގެއް ނެތި މަގުމަތިން އުނދަގޫކޮށް ބަދުނާމު ކުރަމުން ދިޔަ ކަމަށެވެ.
ޑރ. އަފްރާޝީމްގެ ޝަހީދުވުމުގެ ހާދިސާ ނުހައްގުން އަޅުގަނޑާ ގުޅުވައި އަޅުގަނޑުގެ ދިރިއުޅުމާއި ބޭރުގައި އަދާކުރަމުން ދިޔަ ވަޒީފާއަށް ހުރަސް އެޅި
- ޑރ. މުހައްމަދު ޝަހީމް އަލީ ސައީދު
މީގެ އިތުރުން 2018 ގައި ކުރީގެ ރައީސް އަބްދުﷲ ޔާމީންގެ ރަނިންގް މޭޓެއްގެ ގޮތުގައި ނިކުތް ހިސާބުން އޭނާއަކީ ހަރުކަށި ފިކުރުގެ ޖަމާއަތެއްކަމަށްވާ އައިސިސް މީހެއްކަމަށް ބުނެ ސަރަހައްދަށްވެސް ނުރައްކާ އޮތް މީހެއްގެ ގޮތުގައި އޭރު އެމްޑީޕީން ބުނަމުން ދިޔަކަމަށެވެ. އެކި ފަހަރުމަތިން އޭނާއާއިމެދު ނަފުރަތު އުފައްދައި ދަތުރު ފަތުރަށްވެސް ހުރަސް އެޅިކަމަށް ޑރ. ޝަހީމް ވިދާޅުވި އެވެ.
އިތުރަށް ވިދާޅުވީ 2019 ގައި އޯއައިސީގެ ވަޒީފާއަށް ރާއްޖެއިން ބޭރަށް ވަޑައިގެންނެވުމުން މިހާރުގެ ސަރުކާރުގެ ބާރު ހުރި ފަރާތްތަކުން އޯއައިސީން އޭނާ ބޭރުކުރުމަށް ޝަކުވާ ކޮށް ބައިނަލްއަގުވާމީ ގޮތުން ކުރިއެރުމާއި މުސްތަގުބަލަށް ހުރަސްއެޅި ކަމަށެވެ.
މިފަދަ ކިތަންމެ ގޮތަކުން ޑރ. ޝަހީމް އާއިމެދު ނަފުރަތު އުފައްދައި މުސްތަގުބަލު ހަލާކުކޮށްލަން މަސައްކަތް ކޮށްފައިވާކަމަށް ވިދާޅުވި އެވެ. ޑރ. ޝަހީމްއާއި ގުޅުވައި މިއަދުވެސް މަޖިލީހުގައި ވާހަކަތައް ތަކުރާރު ކުރެއްވުމުން އެވާހަކަ ދަންނަވަން ޖެހުނީކަމަށް އޭނާ ވިދާޅުވި އެވެ.
މީގެ އިތުރުން ޑރ. ޝަހީމް ވިދާޅުވީ އެމްޑީޕީގެ އެއްވެސް ވެރިއަކަށް އަމާޒުކޮށް އެއީ ލާދީނީ މީހެކޭ ދުވަހަކުވެސް ބުނެފައި ނުވާނެ ކަމަށެވެ. އަދި އެފަދަ އޯޑިއޯއެއް ނުވަތަ އޯޑިއޯއެއްވެސް އޮންނަމަ ދެއްކެވުމަށް އޭނާ އެދިވަޑައިގެންނެވި އެވެ.
ކަންނެލި އޮޑި، ފަހަރި، ބޮނަކުއާ، ގޮޅާބޯ، ރާގޮނޑި ރާޖާ މިއީ ކޮން ބަޔަކު އުފެއްދި ނަފުރަތު؟ ތިޔަ ބޭފުޅުން އިސްލާހުވީމާ ގައުމު އިސްލާހު ވެދާނެ
- ޑރ. މުހައްމަދު ޝަހީމް އަލީ ސައީދު
ޝަހީމް ވިދާޅުވީ ދޮގުވާހަކަ ދައްކައި މީހުންނާއިމެދު ނަފުރަތު އުފެއްދުން އެމްޑީޕީން ހުއްޓައިލަން ވެއްޖެ ކަމަށެވެ. އޭނާ ވަނީ އެކަމަށް ގޮވާލައްވައިފަ އެވެ.
