ކުރިއަށް އޮތް ރައްޔިތުންގެ މަޖިލިސް އިންތިހާބުގައި ވޯޓުލުމަށް 10،000 އަށްވުރެ ގިނަ މީހުން ރީ-ރަޖިސްޓްރީކޮށްފި އެވެ.
ރީ ރެޖިސްޓްރީ ވުމަށް ހުޅުވާލި 6 ދުވަހުގެ މުއްދަތު، އިއްޔެގެ މެންދުރު ފަހު 3:00 އަށް ވަނީ ހަމަވެފައެވެ.
އީސީން ބުނެފައިވަނީ، ރީ ރަޖިސްޓަރ ވުމަށް ހުށަހަޅާފައިވާ ފޯމުތަކުގެ ތެރެއިން ބަލައިގަނެފައިވަނީ 10،028 ކަމުގައެވެ. އެކި ސަބަބުތަކާހުރެ 1،141 ފޯމު ބަލައިގަނެފައިނުވާކަމަށް އީސީއިން ބުނެފައިވެއެވެ.
ވޯޓުލާފައިވާ ތަން ނޫން އެހެން ތަނަކަށް ވޯޓުލާނަމަ އީސީ މެދުވެރިކޮށް ރީ-ރެޖިސްޓްރީ ވާންޖެހޭނީ ރިޔާސީ އިންތިހާބުގައި ވޯޓުލާތަން ބަދަލުވާ ނަމައެވެ. އޭގެ ތެރޭގައި ބޭރުގެ ގައުމަކަށްވީނަމަވެސް، އަދި ރިސޯޓަކަށްވީނަމަވެސް ރީ-ރަޖިސްޓްރީ ވާންޖެހޭކަމަށް ގަވާއިދުގައިވެއެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އަންނަމަހުގެ 21 ވަނަ ދުވަހުއެވެ.
ކުރިއަށް އޮތް މަޖިލިސް އިންތިހާބުގައި 600 އެއްހާ ފޮށި އެކި ސަރައްހަދުތަކުގައި ބަހައްޓާނެކަމަށް އިލެކްޝަންސް ކޮމިޝަނުން ބުނެ އެވެ. އަދި ކޮންމެ ފޮއްޓަކަށް ވޯޓްލާނީ ގިނަވެގެން 600 އެއްހާ މީހުންކަމަށްވެސް އިލެކްޝަން ކޮމިޝަނުން މީގެކުރިން ވަނީ ބުނެފަ އެވެ.
ރައްޔިތުންގެ މަޖިލީހުގެ އިންތިޚާބުގައި 93 ދާއިރާއަކަށް މެމްބަރުން އިންތިހާބުކުރާނެއެވެ. މި އިންތިހާބުގައި ސިޔާސީ ޕާޓީތަކާއި ޕާޓީތަކަށް ނިސްބަތްނުވާ ބޭފުޅުން ހިމެނޭގޮތަށް ޖުމްލަ 371 ކެންޑިޑޭޓުން ވާދަކުރެއެވެ.
