ކުޑަކުދިންނަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކުރާ މީހުން ދޫކޮށްލުމަކީ އެއްގޮތަކަށްވެސް ބަލައިގަނެވޭނޭ ކަމެއްނޫން ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސްގެ ރަސްމީ 'އެކްސް' އެކައުންޓުން ކުރެއްވި ޕޯސްޓެއްގައި ވިދާޅުވީ ކުޑަކުދިންނަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށް، ނުވަތަ ހުކުމް ކޮށްފައިވާ މީހުންނަށް މައާފުދިނުން، ނުވަތަ ލުއިދީ ދޫކޮށްލުމަކީ އެއްގޮތަކަށްވެސް ބަލައިގަނެވޭނޭ ކަމެއްނޫން ކަމަށެވެ.
''އެގޮތަށް ނިންމާ ނިންމުންތައް ލަސްނުކޮށް އިސްތިއުނާފު ކުރުމަށް ސަރުކާރުން ޕީޖީ ގައި ދަންނަވަމުން'' ރައީސް ލިޔުއްވެވިއެވެ.
ރާއްޖެއަކީ އެފަދަ ނުބައި ފަރާތްތަކުގެ ނުބައި ވަކިތަކުން ސަލާމަތްވެފައިވާ މުޖުތަމައަކަށް ހެދުމަށް އެންމެން އެކުގައި މަސަކަތް ކުރަން ރައީސް ވަނީ ބާރުއަޅުއްވާފައެވެ.
ކުޑަކުދިންނަށް ޖިންސީ ގޯނާކުރާ މީހުންނަށް މާފުދިނުމާ ގުޅޭ ގޮތުން ރައީސް ޕޯސްޓެއް ކުރައްވާފައިވާއިރު ކުޑަކުދިންގެ އޮރިޔާން ފޮޓޯ ޑައުންލޯޑްކޮށްގެން ގެންގުޅުނު މައްސަލައެއްގައި ފުލުހުން ދައުވާކުރަން ފޮނުވި މީހާއަށް ދައުވާނުކޮށް، ނަސޭހަތުގެ އެއްބަސްވުމެއް ޕްރޮސެކިއުޓާ ޖެނެރަލް އޮފީހުން ހަދާފައިވާ ކަމަށް ބުނެ މީޑީއާގައި އިއްޔެ ރިޕޯޓްކޮށްފައިވެއެވެ.
