އެމްޕްލޯއިމަންޓް ސެކްޓާ ކައުންސިލްތަކަށް މެމްބަރުން އައްޔަންކުރުމުގެ ރަސްމިއްޔާތު މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެންއެސްޑީއޭ) އިން އިއްޔެ ބާއްވައިފިއެވެ.
މި ރަސްމިއްޔާތުގެ ގައުމީ ތަރައްގީ އާއި އިގްތިސާދާ ގުޅުންހުރި 6 އެމްޕްލޯއިމަންޓް ސެކްޓާ ކައުންސިލަށް މިނިސްޓަރ އޮފް ހަޔަރ އެޑިޔުކޭޝަން ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރްޔަމް މާރިޔާ އައްޔަންކުރައްވާފައިވާ މެމްބަރުންނަށް އެކަމަނާ ވަނީ ލިޔުން ހަވާލުކޮށްދެއްވާފައެވެ.
މެމްބަރުން އައްޔަންކޮށްފައިވާ 6 ސެކްޓަރ އަކީ:
- ޓްރާސްޕޯސް ސެކްޓަރ
- ސޯޝަލް ސެކްޓަރ
- ޓޫރިޒަމް ސެކްޓަރ
- ފިޝަރީޒް އެންޑް އެގްރިކަލްޗަރ ސެކްޓަރ
- އައިސީޓީ ސެކްޓަރ
- ކޮންސްޓްރަކްޝަން ސެކްޓަރ
މިނިސްޓަރު ވިދާޅުވީ ހުނަރުވެރި، އަމިއްލަ ފައިމައްޗަށް ކޮޅަށް ތެދުވެފައިވާ ޖީލެއް ބިނާ ކުރުމަށް އަދުގެ ރައީސް ޑރ. މުހައްމަދު މުއިއްޒާއި އެމަނިކުފާނުގެ ސަރުކާރުން ކުރައްވަމުން ގެންދަވާ މުހިއްމު މަސައްކަތުގައި ސެކްޓާ ކައުންސިލްގެ މެމްބަރުންގެ ހިއްސާ ވަރަށް ބޮޑު ކަމަށެވެ.
އެގޮތުން ޑރ. މާރިޔާ ވިދާޅުވީ ނޭޝަނަލް ސެޓްފިކެޓަކީ ނޭޝަނަލް ކޮންޕިޓެންސީ ސްޓޭންޑަޑުތަކަށް ހިންގާ ޕްރޮގްރާމް ތަކަށް ދެވޭ ސެޓްފިކެޓަށް ވާއިރު، ދިވެހިރާއްޖޭގެ ވަޒީފާގެ ބާޒާރަށް އަންނަ ބަދަލުތައް ދެނެގަނެ، ވަޒީފާގެ ބާޒާރަށް މީހުން ބޭނުންވާނެ ދާއިރާތަށް ފާހަގަކޮށް އެމްއެންއެސްޑީއޭ އަށް ނެޝަނަލް ކޮމްޕިޓެންސީ ސްޓޭންޑަރޑްތައް އެކުލަވާލުމަށް ބޭނުންވާ ފަންނީ ލަފާ ދިނުމާއި އެކު ސްޓޭންޑަރޑުތަކުގެ ކޮލިޓީ ހިފެހެއްޓުމާއި ފާސްކުރުމަކީ ސެކްޓަރ ކައުންސިލްގެ ޒިންމާއެއް ކަމަށެވެ.
ސެކްޓަރ ކައުންސިލްތަކުގެ މެމްބަރުންނާއި މުޚާތަބު ކުރައްވަމުން އެމްއެންއެސްޑީއޭ ގެ ސީއީއޯ ޑރ. ޒަހުރާ މުހައްމަދު ވިދާޅުވި ގޮތުގައި އެމްއެންއެސްޑީއޭ އަކީ ނެޝަނަލް ކޮމްޕިޓެންސީ ސްޓޭންޑަރޑުގެ މަސައްކަތް ހުއްޓުމެއްނެތި ކުރަމުން އަންނަ ތަނަކަށްވެފައި، 120 ސްޓޭންޑަރޑާއި ޓްރެއިނިންގ މެޓީރިއަލް އެކުލަވާލުމުގެ މަސައްކަތް މިވަގުތުވެސް ކުރިއަށްދާތީ ސެކްޓަރ ކައުންސިލްތަކުގެ މެމްބަރުން ހަލުވި ސްޕީޑްގައި މަސައްކަތް ކުރިއަށް ގެންގޮސްދެއްވުމަށް ވަނީ އެދިވަޑައިގެންފައެވެ.
މި ރަސްމިއްޔާތުގައި މިނިސްޓްރީގެ އިސް އޮފިޝަލުންނާއި ސެކްޓަރ ކައުންސިލްތަކަށް އައްޔަން ކުރެވުނު މެމްބަރުންގެ އިތުރުން އެމްއެންއެސްޑީއޭގެ މުވައްޒަފުން ބައިވެރިވިއެވެ.
