ރާއްޖެއިން ކޮވިޑް-19 ޖެހިގެން އިތުރު މީހަކު ނިޔާވެއްޖެ އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނީ ރޭ 9:23 ގައި ނިޔާވީ އުމުރުން 59 އަހަރުގެ ދިވެހި އަންހެނެއް ކަމަށެވެ. އެމީހާއަކީ ލާމު އަތޮޅުން ކޮވިޑު ޖެހިގެން އެއަތޮޅުގެ ކޮވިޑް މެނޭޖްމެންޓު ފެސިލިޓީގައި ފަރުވާ ދެމުން ދިޔަ މީހެކެވެ.
މިއާއެކު ރާއްޖެއިން ކޮވިޑު ޖެހިގެން މަރުވި މީހުންގެ އަދަދު މިވަނީ 199 އަށް އަރައިފަ އެވެ.
ރާއްޖޭގައި ކޮވިޑުގެ ހާލަތު މަޑުމަޑުން ރަނގަޅުވަމުން ދާއިރު އިއްޔެ މިބައްޔަށް ޕޮޒިޓިވްވީ 224 މީހުންނެވެ. އޭގެ ތެރޭގައި ހިމެނެނީ މާލެއިން ބަލި ޖެހުނު 111 މީހަކާއި އަތޮޅު ތެރެއިން ބަލި ޖެހުނު 105 މީހެކެވެ. މީގެ އިތުރުން ރިޒޯޓުތަކުން 08 މީހުންވެސް އިއްޔެ ކޮވިޑަށް ޕޮޒިޓިވްވި އެވެ.
މިވަގުތު ހޮސްޕިޓަލުގައި އެޑްމިޓުކޮށްގެން ފަރުވާ ދެމުން ދަނީ 79 މީހުންނަށެވެ. މިއަދަދު މިދިޔަ މަސް ނިމުނު އިރު ހުރީ 200 އިން މަތީގަ އެވެ.
މިހާތަނަށް ރާއްޖެއިން ވަނީ 70،897 މީހަކު ކޮވިޑަށް ޕޮޒިޓިވް ވެފަ އެވެ.
