ރާއްޖޭގެ ހުރިހާ ސިޓީއަކާއި އަތޮޅު ކައުންސިލަކުން ޕާސްޕޯޓުގެ ޚިދުމަތް ދޭން ފެށުމަށް ޕާސްޕޯޓް އޮފީސްތައް ގާއިމްކުރުމުގެ މަޝްރޫއުއެއް ސަރުކާރުން މިއަދު އިއުލާންކޮށްފިއެވެ.
އިމިގްރޭޝަނާ، ކައުންސިލުތަކުގެ މިނިސްޓްރީއާ ގުޅިގެން ސެނަކޯ މާލަމުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އާދަމް ޝަރީފް ވިދާޅުވީ, ޕާސްޕޯޓް ހެދެނޭ ގޮތް ހަމަޖައްސައި ދިނުމަަކީ އަތޮޅުތަކުގައި ދިރިއުޅޭ ރައްޔިތުންގެ ވަރަށް ބޮޑު އެދުމެއް ކަމަށެވެ.
އެ ޕްރެސް ބްރީފިންގައި ކޮންޓްރޯލާ އޮފް އިމިގްރޭޝަން ޝައްމާނު ވަހީދު ވިދާޅުވީ ސިޓީތަކުގެ އިތުރުން ހއ. ދިއްދޫއިން ވެސް ޕާސްޕޯޓް މިހާރުވެސް ދޫކުރަމުން ދާނެ ކަމަށެވެ. ރައީސް ނިންމެވި ނިންމުމާ ގުޅިގެން އިދާރީ ގޮތުން ކުރަން ޖެހޭ ކަންކަން މިހާރު ފަށާފައިވާ ކަމަށްވެސް ވިދާޅުވިއެވެ.
ޝައްމާން ވިދާޅުވީ ޕާސްޕޯޓް ހެދުމަށް އެވްރެޖުކޮށް 1،200 އެއްހާ މީހުން އަތޮޅު ތެރެއިން މާލެއަށް އަންނަ ކަމަށެވެ. އެއިން ކޮންމެ މީހަކު އެފަދަ ދަތުރެއްގައި މަދުވެގެން 5،000 ރުފިޔާ ހަރަދުކުރަންޖެހޭ ކަމަށާއި އެއީ ވަރަށް ބޮޑު ތަކްލީފެއް ކަމުގައިވެސް ވިދާޅުވި އެވެ.
"ޕާސްޕޯޓް ހެދުމަށް އަތޮޅު ތެރެއިން އަންނަ މީހުން ކުރާ ހަރަދު ގާތްގަނޑަކަށް ހަތެއް މިލިއަން ރުފިޔާއަށް އަރާ. މިބަދަލާ އެކު މިލިބެނީ އެތައް ބަޔަކަށް އެތައް ފަސޭހައެއް،" ޝައްމާން ވިދާޅުވި އެވެ.
ޝައްމާނު ވިދާޅުވި ގޮތުންނަމަ އަތޮޅު ތެރެއިން ޕާސްޕޯޓު ދޫކުރުމުގެ މައިގަނޑު މަގްސަދަކީ، ބޮޑު ހަރަދެއްނުކޮށް ސަރުކާރުން ލިބޭ ހިދުމަތްތައް ރަށްރަށުންނާއި އަތޮޅުތަކުން ލިބިގެން ދިޔުން ކަމަށެވެ.
