އައިސީޔޫގައި ފަރުވާދެމުން ދަނިކޮށް ހުޅުމާލޭ ޖަލުގައި ތިން އަހަރުގެ ޙުކުމް ތަންފީޒުކުރަމުން ދިޔަ ގައިދީއަކު ނިޔާވެއްޖެއެވެ.
މޯލްޑިވްސް ކަރެކްޝަނަލް ސަރވިސުން ބުނީ ހުޅުމާލޭ ޖަލުގައި ޙުކުމް ތަންފީޒުކުރަމުން ދަނިކޮށް މިރޭ ނިޔާވެފައިވަނީ ރ. މަޑުއްވަރީ ވިންޑްމާގޭ އުމުރުން 44 އަހަރުގެ އަޙްމަދު އިޖާޒު ކަމަށެވެ.
މިދިޔަ މަހުގެ 8 ވަނަ ދުވަހު އަޙްމަދު އިޖާޒަށް ނޭވާލާން އުނދަގޫވެގެން ހުޅުމާލޭ ހޮސްޕިޓަލަށް ގެންދިއުމުން، އޭނާ އެހޮސްޕިޓަލުގެ އީއާރްގައި އެޑްމިޓްކުރެވުނުކަމަށާއި، އޭނާގެ ބަލިހާލަތު ހުރިގޮތުން ޖެހިގެންއައި ދުވޗަހު އައިޖީއެމްއެޗްގެ އައިސީޔޫ ގައި އެޑްމިޓްކޮށް ފަރުވާދޭން ފެށިކަމަށް ކަރެކްޝަނަލް ސަރވިސުން ބުނެ އެވެ. އަދި ޙާލަތު އިތުރަށް ގޯސްވެ، ފަހުން ވެންޓިލޭޓަރަށް ލާފައިވާކަމަށާއި، އޭނާ ނިޔާވެފައިވަނީ މިރޭ 23:30 ހާއިރު ކަމަށް އައިޖީއެމް ހޮސްޕިޓަލާ ހަވާލާދީ ކަރެކްޝަނުން ބުނެ އެވެ.
އަޙްމަދު އިޖާޒު ނިޔާވުމާ ގުޅިގެން އެކަން ވަގުތުން އޭނާގެ ޢާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ އިތުރުން ނެޝަނަލް އިންޓެގްރިޓީ ކޮމިޝަން އަށް އަންގާފައިވާކަމަށް ކަރެކްޝަނުން ބުނެ އެވެ.
