ރާއްޖެއަށް އެތެރެކުރި 119 ކިލޯގެ ޑްރަގް މައްސަލާގައި ތުހުމަތު ކުރެވުނު ގިނަ މީހުންގެ މައްޗަށް ކުށް ސާބިތުނުވާ ކަމަށް ކޯޓުން ނިންމިޔަސް, އެ މައްސަލާގައި އެންމެންގެ މައްޗަށް ކުށް ސާބިތުވާނެ ހެކި ހޯދާފައިވާ ކަމަށް ފުލުހުން މިއަދު ބުނެފި އެވެ.
ފުލުހުން މިކަން ހާމަކުރީ މިއަދު ބޭއްވި ނޫސްވެރިންގެ ބައްދަލުވުމުގައެވެ.
މި ބައްދަލުވުމުގައި ފުލުހުން ވަނީ މަސްތުވާތަކެތި އަތުލައިގަތުމަށް ކުރިއަށް ގެންދިޔަ އޮޕަރޭޝަނާ ގުޅޭ ވީޑިއޯ ޕްރެސެންޓޭޝަނެއް ހިއްސާކޮށްފައެވެ. އެގޮތުން މި މައްސަލައިގައި ދައުވާކުރި މީހުން ޑްރަގް އެތެރެ ކުރުމަށާއި މާލެއާއި ހުޅުމާލޭގައި މިތަކެތި ރައްކާކޮށް ވިޔަފާރި ކުރުމަށް ކުރި މަސައްކަތް ފުލުހުން ވަނީ މަންޒަރާއެކު ހިއްސާކޮށްފައެވެ.
ރާއްޖެއަށް މަސްތުވާތަކެތި އެތެރެކޮށް ވިޔަފާރިކުރާކަރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން 2021 ވަނަ އަހަރުގެ ޑިސެމްބަރު މަހުގެ 12 އިން 14 އަށް މާލެއާއި ހުޅުމާލޭގައި ހިންގި އޮޕަރޭޝަންތަކުގައި ހައްޔަރުކޮށްފައި ވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދެވެ.
މީގެ އިތުރުން މި މައްސަލައިގައި ތުހުމަތު ކުރެވޭ ގދ. ހޯނޑެއްދޫ ދޯދި، މުހައްމަދު އަކްރަމް އަބްދުލްހަންނާން ހިމެނެއެވެ. ނަމަވެސް އޭނާ ވަނީ މި މައްސަލައިގައި އެއްބަޔަކު ހައްޔަރުކުރި ދުވަހު ރާއްޖެއިން ބޭރަށް ފުރައި ފިލައިފައެވެ. އަދި އޭގެ ފަހުން މިއަދާ ހަމަޔަށްވެސް އެނބުރި ރާއްޖެ އައިސްފައެއް ނުވެއެވެ.
