މި ސަރުކާރު އައުމުގެ ކުރިން ހުރީ ހުރިހާ މަޝްރޫއުތަކެއް ހުރީ ހިއްޓިފައިކަމަށާއި، މަޝްރޫއުތައް ފެށި މި ސަރުކާރުން ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް އޮފީހުން ކުރިޔަށް ގެންދާ "ރައީސްގެ ޖަވާބު" މި ސިލްސިލާގެ މިއަދުގެ ސެގްމަންޓުގައި މާލެ ސިޓީ، މމޚދަފްތަރު 12151، އާމިނަތު ނަޒީރާ ރައީސްއާއި ކުރި ސުވާލަކީ، ކުރީން ހިންގަމުން އައި މަޝްރޫޢުތައް މި ސަރުކާރުން ހުއްޓާލާފައިވާކަމަށް ވާދަވެރި ފަރާތްތަކުން ދައްކާ ވާހަކަތަކަކީ ހަގީގަތެއް ތޯއެވެ.
އޭނާގެ ސުވާލުގެ ޖަވާބުގައި ރައީސް މުއިއްޒު ވިދާޅުވީ މި ސަރުކާރުން ވެރިކަމަށް އައި އިރު ތަރައްގީގެ ހުރިހާ މަޝްރޫއެއްހެން ހުރީ ހުއްޓިފައި ކަމަށާއި މަޝްރޫއުތައް ހުއްޓުވަނީ މި ސަރުކާރުން ކަމަށް ދައްކާ ވާހަކައަކީ ދޮގެއް ކަމުގައެވެ.
ރައީސް ވިދާޅުވީ އެއީ އިދިކޮޅުން ދައްކާ ދޮގުތަކުގެ ތެރެއިން އެންމެ ބޮޑު ދޮގުކަމަށާއި މި ސަރުކާރުން ހަވާލުވިއިރުގަ އެ ފާހަގަކުރައްވާ މަޝްރޫއުތައް އޭރުގެ ސަރުކާރުގެ ދުވަސްވަރު ހުރީ ހުއްޓިފައި ކަމަށެވެ. އަދި އެ ރަށްރަށުގެ ބޭފުޅުން އެކަމަށް ހެކިވެވަޑައިގަންނަވާނެ ކަމަށެވެ.
“ކެމްޕޭނު ތެރޭގަ އޭރު އެ ސަރުކާރު ދުވަސްވަރު، ހުރިހާ ރަށަކަށް ދެވުނު، އެއިން ކޮންމެ ރަށެއްގަ ހުރީ މަޝްރޫއުތައް ހުއްޓިފަ، މަދު މަޝްރޫއެއް ނޫނިއްޔާ ހުރީ އެކި ސަބަބުތަކާ ހެދި ހުއްޓިފަ، ފެނުނު ރަށްރަށުގަ މިސާލަކަށް ފެނާ ނަރުދަމާ މަޝްރޫއު ހޮޅިތައް މަގުމަތީގަ މަސައްކަތް ކުރާނެ މީހަކު ނެތް، މަގު ހަދަން ފަށާފަ މީހެއްގެ ހިލަމެއް ނެތް، މިހެން ގޮސް ބަނދަރުތަކުގެ މައްސަލަ، ސްކޫލުގެ އިމާރާތްތައް ފަށާފަ އޮނިގަނޑުން ކޮންމެވެސް ވަރެއް ނިންމާލާފަ، އަހާލީމަ މީގެ ދެ އަހަރު ކުރިން ހުއްޓިފަ ކަމަށް ހެލްތު ޕޯސްޓްތައް ހެލްތު ސެންޓަރުތައް އެގޮތަށް، މިގޮތަށް ގޮސް ހުރިހާ މަޝްރޫއުތަކެއް ހުއްޓިފަ ހުރީ” ރައީސް ވިދާޅުވިއެވެ.
ރައީސް ފާހަގަކުރެއްވިގޮތުގައި އޭރު ކަންކުރި ގޮތަކީ ޕާޓީގެ ކޮންމެވެސް މީހަކަށް ފައިސާކޮޅެއް ދޭންކަމުގެ ތުހުމަތުގެ ގޮތުގައި އަޑުއިވުނު ކަމަށާއި، އެ މޭރުމުނ ފައިސާ ދޭންވެގެން ކޮންމެވެސް ފަރާތަކަށް ޕްރޮޖެކްޓްދީ، ދެން އޭނައަށް އެޑްވާންސް ދީ، އޭނައަށް އެ ފައިސާކޮޅު ލިބުނީމަ އޭނަ އެހިސާބުން ގޮސް، އަނެއްކާވެސް އެ މަޝްރޫއު ޕާޓީގަ އެހެންމީހަކަށް ހަވާލު ކުރަނީ ކަމަށެވެ.
“މާނައަކީ ތިން ހަތަރުފަހަރު އެބަހުއްޓޭ އެކި ފަރާތްތަކަށް ދީފަ، އެޑްވާންސް ޕޭމަންޓް ނަގާފަ ދެން މަޝްރޫއު ކުރިއަށް ނުގެންދޭ، ބައެއް ރަށްތަކުގަ ކުދިކުދި މަސައްކަތް ހިނގަނީ، ސްކޫލް އިމާރާތް މަލްޓިޕާޕަސް ހޯލް، ސްކޫލް މަލްޓިޕާޕަސް ހޯލް އަޅަން ހަވާލުކޮށްފަ ހަމައެކަނި ވީލްބަރޯއެއްގަ ދެމީހަކުވެގެން ސިމެންތިކޮޅެއް ކޮންކްރީޓްކޮޅެއް ގަށާލައިގެން އުފުއްލާތަންވެސް ފެނުނު، މީ މަސައްކަތް ހުރިގޮތް އޭރު” ރައީސް ވިދާޅުވިއެވެ.
ރައީސް ވިދާޅުވީ އެ ހުރިހާކަމެއް ފެއްޓުވީ،މި ވެރިކަން އައިސްގެން ކަމަށާއި މިހާރު ގިނަ ރަށްރަށުގައި ކަންކަން ފެށިފައިވާކަމަށެވެ. އެތައް ބަޔަކަށް ނުދީހުރި ފައިސާ ހުރިއިރު ފައިސާ ނުދީ މަސައްކަތް ކުރާނެ ގޮތެއް ނޯންނާނެކަން ފާހަގަކޮށް އެއީ ކުދި އަދި ކޮންމެވެސް ވަރަކަށް މެދުފަންތީގެ ކުންފުނިތައް ކަމުގައިވާއިރު އެމީހުންގެ އަތުގަ ކޭޝްފްލޯ ނެތީމަ މަސައްކަތެއް ނުހިނގާނެކަން ރައީސް ފާހަގަކުރެއްވިއެވެ.
