ކުރިއަށް އޮތް ރައްޔިތުންގެ މަޖިލިސް އިންތިޚާބުގައި ވޯޓުލާން ބޭނުންކުރާ ކަރުދާސް މިމަހުގެ 16 ވަނަ ދުވަހު އަތޮޅުތަކަށް ފޮނުވަން ފަށާނެ ކަމަށް އިލެކްޝަންސް ކޮމިޝަނުން(އީސީއިން) ބުނެފި އެވެ.
އީސީއިން ބުނީ ރަށްރަށަށް ވޯޓު ކަރުދާސް ފޮނުވާނީ ދިވެހި ފުލުހުންގެ ޚިދުމަތުގެ ބެލުމުގެ ދަށުން ސަލާމަތާއި ރައްކާތެރިކަމާއެކު ކަމަށެވެ.
މިމަހުގެ 21 ވަނަ ދުވަހު އޮންނަ މަޖިލިސް އިންތިޚާބުގައި 284،663 މީހަކަށް ވޯޓުލުމުގެ ހައްގުލިބިގެންވެއެވެ. މިފަހަރުގެ އިންތިޚާބުގައި އޮބްޒަރވަރުންނާއި މޮނިޓަރުންނާއި ޕާޓީތަކުގެ މަންދޫބުންގެ ގޮތުގައި 9000 ވުރެ ގިނަ މީހުން ހަރަކާތްތެރިވާނެކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.
އަންނަ ރައްޔިތުންގެ މަޖިލީހުގެ އިންތިޚާބުގައި 93 ދާއިރާއަކަށް 368 ކެންޑިޑޭޓުން ވާދަކުރެއެވެ.
މަޖިލިސް އިންތިޚާބަށް ޗާޕުކޮށްފައިވަނީ ކިހާ ކަރުދާހެއްކަމެއް އިލެކްޝަންސް ކޮމިޝަނުން އަދި ހާމަކޮށްފައެއް ނުވެއެވެ.
