މ. ރަބީއުވިލާ ގޭގައި އަލިފާނުގެ ހާދިސާ ހިނގި ސަރަހައްދަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަޑައިގެން އެ ސަރަހައްދުގެ ހާލަތު ބައްލަވާލައްވައިފިއެވެ.
ރައީސް އެ ސަރަހައްދަށް ވަޑައިގެންއިރު، އަލިފާންގަނޑު ވަނީ ކޮންޓްރޯލް ކުރެވިފައެވެ.
އަލިފާން ރޯވެފައިވަނީ ބާވެ ވެއްޓެން ކައިރިވެފައިހުރި އެ ގޭގެ ހަތަރު ވަނަ ފަންގިފިލާގައެވެ.
އެމްއެންޑީއެފްއިން ބުނީ، އެ ގޭގައި އަލިފާން ރޯވެގެން ރިޕޯޓް ކޮށްފައިވަނީ ގާތްގަނޑަކަށް 8:30 ހާއިރު ކަމަށެވެ. އަދި މި ހާދިސާގައި އެއްވެސް މީހަކަށް އަނިޔާވެފައިވާކަން މިހާތަނަށް އެނގިފައިނުވާ ކަމަށް އެމްއެންޑީއެފުން ބުންޏެވެ.
ރަބީއުވިލާ ގޭގެ ވެރިފަރާތުން ''ނުކުތާ'' އާ ވާހަކަ ދައްކަމުން ބުނީ، އެ އިމާރާތުގައި ބަޔަކު ނުޅޭތާ ހަ ވަރަކަށް އަހަރު ވެދާނެ ކަމަށެވެ. އެތަން ބޭނުންކޮށް އުޅެނީ މަސްތުވާތަކެތި ބޭނުންކުރާ މީހުން ކަމަށް ރާއްޖެއިން ބޭރުގައި އާއިލާއާއެކު އުޅޭ އެމީހާ ތުހުމަތު ކުރިއެވެ. ބުނީ ބޮޑަށް ލަފާކުރެވެނީ ބަޔަކު ރޯކޮށްލި ކަމަށެވެ.
