ސައްހަނޫން ޑޮލަރުގެ ނޫޓުތަކެއް ދައުރުވަމުންދާތީ އެކަމަށް ސަމާލުވުމަށް ފުލުހުން އަންގައިފިއެވެ.
ރާއްޖޭގައި މިހާރު ދައުރުވަމުންދާ ފޭކު ޑޮލަރުގެ ނޫޓުތައް ހިއްސާ ކުރަމުން ފުލުހުން ވަނީ ބޭރު ފައިސާ ގަނެވިއްކުމުގެ ހުއްދަ އޮތް ފަރާތްތައް މެދުވެރިކޮށް ނޫނީ ޑޮލަރު ގަތުމުގެ މުއާމަލާތް ނުކުރުމަށް އެދިފައެވެ.
އެފަދަ މުއާމަލާތެއް ހިންގާކަމުގެ މައުލޫމާތު ލިބިއްޖެނަމަ ފުލުހުންނާއި ހިއްސާ ކުރުމަށާއި ޑޮލަރުގެ މުއާމަލާތް ކުރާއިރު ރަނގަޅަށް ނޫޓު ޗެކްކޮށް ބެލުމަށް ވަނީ ފުލުހުން އިލްތިމާސްކޮށްފައެވެ.
މިހާރު ދައުރުވަމުންދާ ސައްހަ ނޫން ޑޮލަރު އަސްލާ ދާދި އެއްގޮތް ނަމަވެސް ދެ ފަރާތުގައި 'ކޮޕީ' އިނގިރޭސި ބަހުން ލިޔެފައިވެއެވެ.
100 އެމެރިކާ ޑޮލަރުގެ ސައްހަނޫން ނޫޓު ތަކެއް ދައުރުވަމުން ދާތީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވެސް ވަނީ 100 އެމެރިކާ ޑޮލަރުގެ ހުދު ބޯޑަރު ހިމެނޭ ނޫޓު ބަލައިގަތުމުގައި ސަމާލުވުމަށާއި ބަލައިގަނެވޭ ނޫޓުގެ ސައްހަ ކަމާމެދު ޝައްކުކުރެވޭ އެއްވެސް ނޫޓެއް ފެނިއްޖެނަމަ، އެ އޮތޯރިޓީއަށް ގެނެސް އެ ނޫޓެއްގެ ސައްހަކަން ކަށަވަރު ކުރުމަށް އިލްތިމާސް ކޮށްފައެވެ.
