ލ. ފޮނަދޫ ތަރައްގީކުރާނީ އާބަން ސެންޓަރެއްގެ ގޮތުގައި ކަމަށާއި އެރަށުގައި ބިން ބޮޑުކުރުމާއި ބޯހިޔާވަހިކަމުގެ ބޮޑު މަޝްރޫއެއް ހިންގަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިރޭ ފޮނަދޫގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ ތަރައްގީއަށް އެންމެ މުހިންމީ ދެމެހެއްޓެނިވި ގޮތެއްގައި ތަރައްގީ ހާސިލްވާ ގޮތަކަށް ކަންކަން ކުރުން ކަމަށެވެ. އެގޮތުން، މި ސަރުކާރުގެ މާސްޓަ ޕްލޭންއާ އެއްގޮތަށް ހަތް އާބަން ސެންޓަރު ގާއިމުކުރައްވާނެ ކަމުގައި އެމަނިކުފާނު ވިދާޅުވިއެވެ. އަދި އެ ސެންޓަރުތަކުން ދެމެހެއްޓިނިވި ގޮތެއްގައި ރާއްޖޭގެ ހުރިހާ ރައްޔިތުންނަށް އެންމެ މަތީ ފެންވަރުގައި ހުރިހާ ދާއިރާތަކުން ހިދުމަތްތައް ދެވޭނެކަން ފާހަގަކުރެއްވިއެވެ.
ރައީސް ވިދާޅުވީ، އާބަން ސެންޓަރެއްގެ ގޮތުގައި ފޮނަދޫ ތަރައްގީ ކުރެވޭއިރު، ގެދޮރުވެރިކަމުގެ މައްސަލަތައް ހައްލުކުރެވިގެންދާނެ ކަމަށެވެ. އެ މަސައްކަތް ކުރުމުގެ ގޮތުން އިތުރަށް ބިން ހިއްކައި، ހައުސިންގެ ބިޔަ ބޮޑު މަޝްރޫއުއެއް ހިންގުމަށް ނިންމާފައިވާނެކަން ރައީސް އިއުލާން ކުރެއްވިއެވެ. ވިދާޅުވީ އެކަމުގެ ސަބަބުން އާބާދީ އެއްފަސްކުރެވިގެންދާނެ ކަމަށް ވިދާޅުވިއެވެ.
އެ އާބަން ސެންޓަރުތައް ވެގެންދާނީ އެންމެ ފެންވަރު ރަނގަޅު ހިދުމަތްތައް ގާއިމުވެގެންދާ ތަންތަނަށް ކަމަށާއި މާލެގައި ހުންނަ ހުރިހާ ހިދުމަތަކަށްވުރެ ރަނގަޅަށް ތަރައްގީ ކުރުމަކީ އަމާޒެއް ކަމަށްވެސް ރައީސް ވިދާޅުވިއެވެ.
މިގޮތަށް ކަނޑައެޅި ހަތް ސަރަހައްދެއް އޮންނާނެ ކަމަށް، އޭގެ ތެރެއިން އެއް ރަށަކީ މިރަށް، ލާމު އަތޮޅު ފޮނަދޫ ރައީސް ވިދާޅުވިއެވެ.
ރައީސް ވިދާޅުވީ އެ މަޝްރޫއުތަކަކީ ބެޖުޓުގައި ހިމަނައިގެންނާއި އިންވެސްޓްމެންޓްތަކުންނާއި ފައިނޭންޝަލް މޮޑެލްތަކުގެ ތެރެއިން ހިންގާނެ މަޝްރޫއުތަކެއް ކަމަށެވެ. މީގެ ސަބަބުން ދެމެހެއްޓެނިވި ތަރައްގީގައި އާބާދީ އެއްފަސް ކުރުމުގެ ކަންކަން ފެށޭނެ ކަމަށެވެ.
