މި ސަރުކާރުން ރިޔާސީ ކޮމިޝަން ހަދައިގެން، ސިޔާސީ މީހުން ގެންގޮސް ހައްޔަރުކޮށް ޖަލަށް ނުލާނެ ކަމުގައި ރައީސް މުއިއްޒު ވިދާޅުވެއްޖެއެވެ.
އައްޑޫ ސިޓީ ހިތަދޫ ރައްޔިތުންނާ ބައްދަލުކުރުމަށް ރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ މި ސަރުކާރުގައި ބަދަލުހިފުމުގެ ރޫހު ނުފެންނާނެ ކަމަށާއި ސިޔާސީ ބޭފުޅުން ކިތަންމެ ގިނަ ވާހަކަތަކެއް ޕޯޑިއަމްތަކުގައި ދެއްކި ނަމަވެސް ހައްޔަރު ނުކުރާނެ ކަމަށެވެ.
ރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ބަދަލު ނުހިފާނެ ކަމަށް ރިޔާސީ އިންތިޚާބުގައި ވައުދުވި ކަމަށާއި ނަމަވެސް ބައެއް ފަރާތްތަކުގެ ކިބައިން ފެންނަނީ އަނެއްކާވެސް މަޖިލިސް ތެރެއިން ބާރު ހޯދައިގެން ރައްޔިތުންގެ މައްޗަށް ބަދަލު ހިފަން އުޅޭ މަންޒަރު ކަމަށެވެ.
އެ ފުރުސަތު ރައްޔިތުން ދީގެން ނުވާނެ ކަމަށާއި ރާއްޖެ އޮންނަން ޖެހޭނީ ދިވެހިންގެ އަތްމަތީގައި ކަމަށްވާއިރު މި މަހުގެ 21 ގައި ރައްޔިތުންލާ ވޯޓަކީ ތަރައްގީ އަށް ދޭ ވޯޓަކަށް ހެދުމަށް ރައީސް ގޮވާލެއްވި އެވެ.
މާލެއާ އެއް ފެންވަރަށް ތަރައްގީވެފައިވާ ސިޓީއަކަށް އައްޑޫ ސިޓީ ހެދުމަކީ ސަރުކާރުގެ އަމާޒެއް ކަމަށް ވެސް ރައީސް ވިދާޅުވި އެވެ.
ރައީސް ވިދާޅުވީ ދެމެހެއްޓެނިވި ތަރައްގީ ހާސިލް ވާނީ މާލެ ސިޓީ ނުވަތަ ގްރޭޓާ މާލެ ސަރަހައްދާ އެއް ފެންވަރަކަށް ދެކުނުގެ ހަތަރު އަތޮޅާއި އުތުރުގެ ހަތަރު އަތޮޅު އަދި މެދު ރާއްޖެތެރޭގެ ހަތް ސަރަހައްދެއް އިންޓަގްރޭޓެޑް ޑިވެލޮޕްމެންޓް ކޮންސެޕްޓްގައި ޒޯނެއް ގޮތަށް ތަރައްގީ ކުރެވިގެން ކަމަށެވެ
ރައީސް ވަނީ ސަދަން ޑިވެލޮޕްމެންޓް ޒޯންގެ މައި ހަބަކީ އައްޑޫ ސިޓީ ކަމަށް ވެސް ވިދާޅުވެފައެވެ.
