މާލޭ ދެކުނު ފަރާތު ބަނދަރު ފަޅުތެރޭގައި އޮތް ލޯންޗުތަކެއްގައި ރޯވެ މިލިއަނުން ގެއްލުން ލިބިއްޖެ އެވެ.
މޭރީ ބްރައުން ކުރިމަތީގައި ހުރި ލޯންޗުތަކެއްގައި އަލިފާން ރޯވެ ހިނގި މިހާދިސާގައި އެތަނުން އެއް ލޯންޗުގައި ހުރި ބިދޭސީއަކު ވަނީ ވަރަށް ބޮޑަށް ފިހިފަ އެވެ. އެމީހާއަށް މިހާރު އަންނަނީ އައިޖީއެމް ހޮސްޕިޓަލުގައި ފަރުވާ ދެމުންނެވެ.
މާލޭގައި މިއަދު ހިނގި އަލިފާނުގެ ހާދިސާ
އެމްއެންޑީއެފްއިން ބުނީ ތިން ލޯންޗެއްގައި ރޯވެފައިވާ ކަމަށެވެ. އަދި ހާދިސާގެ ރިޕޯޓު ލިބުނީ މިއަދު ހެނދުނު 6:13 ގައި ކަމަށާއި ފަޔަރ އެންޑް ރެސްކިއު ޓީމުން އަލިފާންގަނޑު ކޮންޓްރޯލް ކުރުމުގެ މަސައްކަތް ވަގުތުން ފަށާފައިވާ ކަމަށް އެމްއެންޑީއެފްއިން ބުންޏެވެ.
ތިން ލޯންޗެއް މުޅިންހެން އަނދައި ހުލިވެފައިވާ ވާއިރު އިތުރު ލޯންޗަކަށްވެސް އަލިފާނުގެ ސަބަބުން ވަނީ ގެއްލުންތަކެއް ލިބިފަ އެވެ. ފުލުހުން ބުނެފައިވަނީ މި ހާދިސާގައި 6 ލޯންޗަކަށް އެކިވަރުގެ ގެއްލުން ލިބުނު ކަމަށެވެ.
މިއިން ކޮންމެ ލޯންޗެއްގެ އަގު މިލިއަނަކަށް އަރާނެ ކަމަށް ބެލެވެ އެވެ.
މާލޭގައި މިއަދު ހިނގި އަލިފާނުގެ ހާދިސާ
ހާދިސާ ހިނގަން މެދުވެރިވި ސަބަބެއް ފުލުހުންވެސް އެމްއެންޑީއެފްއިންވެސް މިހާތަނަށް ހާމައެއް ނުކުރެ އެވެ. އެހެންނަމަވެސް މި ދެ މުއައްސަސާގެ އޮފިޝަލުން މިވަގުތު ދަނީ އެސަރަހައްދުގައި ހަރަކާތްތެރިވަމުންނެވެ.
