އެމަނިކުފާނުގެ ދުއާއަކީ މާދަމާ އޮންނަ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ އިސްތިއުނާފީ ޝަރީއަތުން އެމަނިކުފާނު މިނިވަންވުން ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
މިރޭ އޮތް ގައްދޫ ދާއިރާއަށް ޕީއެންސީގެ ޓިކެޓުގައި ކުރިއަށް އޮތް މަޖިލީހުގައި ވާދަކުރައްވާ މުހައްމަދު އަލީގެ ކެމްޕޭން އިވެންޓުގައި ވާހަކަ ދައްކަވަމުން ރައީސް މުއިއްޒު ވިދާޅުވީ ޔާމިންގެ މައްސަލަ އަވަހަށް ނިންމައިދިނުމަށް އެމަނިކުފާނުވެސް ގޮވާލައްވާފަ ވާނެ ކަމަށެވެ.
ރައީސް މުއިއްޒު ވިދާޅުވީ ރައީސް ޔާމީންގެ ޝަރީއަތް އިންސާފުވެރިކަމާއި އެކު ކުރިޔަށް ގެންދަން އަބަދުވެސް ޝަރުއީ ދާއިރާއަށް ގޮވާލެއްވިކަމަށެވެ. އަދި އެމަނިކުފާނަށް ރިޔާސީ އިންތިހާބު ކާމިޔާބު ކުރެވި އެންމެ ފުރަތަމަ އޮތް ބައްދަލުވުމުގައި ވެސް އެމްޑީޕީއަށް ގޮވާލީ ރައީސް ޔާމީން މިނިވަން ކުރުމަށްކަމަށް ވެސް ރައީސް ވިދާޅުވި އެވެ. އެއާއި އެއްގޮތަށް ރައީސް ޔާމީން ގޭބަންދަށް ބަދަލު ކުރި ނަމަވެސް އެމްޑީޕީން މިހާރު ވެސް ދަނީ ޝަރުއީ ދާއިރާގެ ތެރެއަށް އެކި ގޮތްގޮތުން ނުފޫޒު ފޯރުވަމުންކަމަށް ރައީސް ތުހުމަތު ކުރެއްވި އެވެ.
ރައީސް ވިދާޅުވީ ޖޭއެސްސީގެ ރައީސްގެ މަގާމު ހިމެނޭހެން އެ ކޮމިޝަނުގައި ތިބީ އެމްޑީޕީގެ މެމްބަރުންކަމަށާއި، މަސައްކަތް ކުރަނީ އެބޭފުޅުން ބޭނުންވާ ގޮތަކަށް ކަމަށެވެ. ރައްޔިތުންގެ މަޖިލީހުގެ ރައީސް، މި މައްސަލައިގައި މާބޮޑަށް ކަންބޮޑުވާކަމަށް ދައްކައި ޖޭއެސްސީއަށް މައްސަލަ ވެއްދި ނަމަވެސް އެއީ ރައްޔިތުންގެ ލޮލުގައި އަޅުވާ އަނދުނެއްކަމަށް ރައީސް ސިފަ ކުރެއްވި އެވެ. އަދި ފަސް އަހަރު ވެގެން އައިސް މިއަދާއި ހަމައަށް އެކަން އޭރު އެބޭފުޅުން ނުކުރެއްވި ސަބަބާއި މެދި އެމަނިކުފާނު ސުވާލު އުފެއްދެވި އެވެ.
ރައީސް މުއިއްޒު ވިދާޅުވީ އެހެންނަމަވެސް ރައީސް ޔާމިންގެ މައްސަލައަށް އެމްޑީޕީން ނުގޫޒު ފޯރުވާ ކަމަށާއި، ޖޭއެސްސީގެ މެޖޯރިޓީ އޮތީވެސް އެމްޑީޕީގަ ކަމުގައެވެ.
ޖޭއެސްސީ މިއޮތީ މިހާރުގެ މަޖިލީހުގެ މެޖޯރިޓީ އޮތް ބޭފުޅުންގެ އަތުގައި. ޖޭއެސްސީގެ ރައީސަކީ ވެސް އެމްޑީޕީގެ ބޭފުޅެއް. މަޖިލީހުގެ ރައީސަކީ އެމްޑީޕީ ބޭފުޅެއް. މަޖިލީހުގެ ރައީސްގެ ހައިސިއްޔަތުން ޖޭއެސްސީގައި އިންނަވާ. އަދި މަޖިލީހުގެ މެމްބަރެއް ޖޭއެސްސީގައި އިންނަވާ. އެހެންގޮސް އެމްޑީޕީގެ ފުލް ބާރު ޖޭއެސްސީގައި މި އޮންނަނީ.
ރައީސް ވިދާޅުވި އެވެ.
މިދިޔަ އަހަރުގެ ފަހުކޮޅުން ފެށިގެން މަޑުޖެހިފައި އޮތް ރައީސް ޔާމީންގެ ހުކުމުގެ އިސްތިއުނާފާއި މެދު ގޮތެއް ނިންމުން މާދަމާގެ މެންދުރު 13:00 އަށް ވަނީ ތާވަލުކޮށްފަ އެވެ.
