ކްރިމިނަލް ކޯޓުން އިއްވާފައިވާ 11 އަހަރުގެ ޖަލު ހުކުމް މިރޭ ހައިކޯޓުން ބާތިލުކުރުމާއެކު، އާދީއްތަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބުގެ ކެންޕެއިނަށް މާދަމާ ފުފާވަޑައިގަންނަވާނެ ކަމަށް ރައީސް ޔާމީން ވިދާޅުވެއްޖެ އެވެ.
ހުކުމް ބާތިލް ކުރުމަށް ބޭއްވި ޝަރީއަތަށްފަހު ހައިކޯޓު ބޭރުގައި ނޫސްވެރިންނާއި ވާހަކަ ދައްކަވަމުން ރައީސް ޔާމީން ވިދާޅުވީ އެމަނިކުފާނު މިހާރު ނިސްބަތްވެވަޑައިގަންނަވާ ޕާޓީ ޕީޕަލްސް ނެޝަނަލް ފްރޮންޓް(ޕީއެންއެފް)ގެ ކުރިއަށް އޮތް ރައްޔިތުންގެ މަޖިލީހުގެ ކެންޕެއިނަށް މާދަމާ ހަވީރު ފުރާވަޑައިގަންނަވާނެ ކަމަށެވެ. ނަމަވެސް ވަޑައިގަންނަވާނީ ކޮން ރަށަކަށްކަމެއް ވިދާޅެއް ނުވެއެވެ. ވިދާޅުވީ ވަޑައިގަންނަވާނީ އާބާދީ ބޮޑު ސަރަހައްދަކަށް ކަމަށެވެ.
އެނގިފައިވާގޮތުގައި ކެންޕެއިނަށް އެމަނިކުފާނު ވަޑައިގަންނަވަނީ ފުވައްމުލަކު ސިޓީއަށެވެ.
މާދަމާ ހަވީރު އިރުއޮއްސެންވާއިރަށް ހަމަ ރާއްޖޭގެ އާބާދީ ބޮޑު ދިމާލަކަށް ދަތުރުކުރަން ކެންޕެއިނަށް. އެއާއެކީ މިއޮތް ވަގުތުކޮޅުތެރޭގައި ކުރެވޭނެ މަސައްކަތެއް ކުރާނަން،" ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ އެމަނިކުފާނު ބަންދުގައި ހުންނެވި ދުވަސްވަރު ވެސް މަޖިލީހުގެ ކެންޕެއިނަށް މަސައްކަތް ކުރަށްވަމުންގެންދަވާ ކަމަށެވެ.
އިންތިޚާބު ގްރައުންޑަށް ފައިބައިގެން ބިމަށް ފައިބައިގެން ކެންޑިޑޭޓުން ކުރާތާ އެތަށް ދުވަހެއް ވެއްޖެ. ދެން ކެންޑިޑޭޓުން ބޭނުންވާ ކަންކަން އަޅުގަނޑުމެން ކޮށްދޭތާ ވަރަށް ގިނަ ދުވަސް ވެއްޖެ. ޚުދު ރައީސް ޔާމީނުވެސް ކެންޑިޑޭޓުން އެބުނާ އެތަށް މީހުންނަކަށް ފޯނުކޮށްދީ އެމީހުންގެ ގްރޫޕް ބައްދަލުވުންތަކުގައި ރައީސް ޔާމީނުގެ ތާއީދު އޮތީ މިވެނި މީހަކަށޭ މި މަސައްކަތް އަޅުގަނޑު ކުރަމުން އަންނަތާ ވަރަށް ގިނަ ދުވަސް ވެއްޖެ." ރައީސް ޔާމީން ވިދާޅުވި އެވެ.
