ރައީސް ޑރ. މުހައްމަދު މުއިއްޒުގެ ރޯލް މޮޑެލްއަކީ އެމަނިކުފާނުގެ އިސް ވަޒީރު އަބްދުއްރަހީމް އަބްދުﷲ ކަމަށް ވިދާޅުވުމުން ކުރީގެ ރައީސް އަބްދުﷲ ޔާމީން ފާޑު ވިދާޅުވެއްޖެ އެވެ.
ހައިކޯޓު ބޭރުގައި ނޫސްވެރިންނާއި ވާހަކަ ދައްކަވަމުން ރައީސް ޔާމީން ވިދާޅުވީ މިއޮތް ތައުލީމީ ޒަމާނުގައި "ތިމަންނަގެ ރޯލް މޮޑެލްއަކީ އަބްދުއްރަހީމޭ ވިދާޅުވާ ހިސާބުން މި ދުރަށް މިދަނީ ކިހާ ހިސާބަކަށްތޯ ތިޔަބޭފުޅުން ތަސައްވަރުކުރައްވާ" އެވެ.
އެގޮތަށް ދެކެވަޑައިގަންނަވާ ބޭފުޅަކަށް އަންނަ އާދީއްތަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބުގެ މެޖޯރިޓީ ދޭން ރަނގަޅު ނުވާނެ ކަމަށް ރައީސް ޔާމީން ވިދާޅުވި އެވެ.
ސިޔާސީ ކަންކަމުގައި އެންމެ ގާތް ބޭފުޅަކީ އަބްދުއްރަހީމޭ ރައީސް މުއިއްޒު ވިދާޅުވީ މަޖިލިސް އިންތިޚާބުގެ ކެންޕެއިނަށް އެމަނިކުފާނު ލ. ފޮނަދޫ ދާއިރާއަށް ވަޑައިގެންނެވެ. އަބްދުއްރަހީމު ވަނީ އަންނަ މަޖިލިސް އިންތިޚާބުގައި ލ. ފޮނަދޫ ދާއިރާއަށް ކުރިމަތިލައްވާފަ އެވެ. ރައީސް މުއިއްޒު ވިދާޅުވެފައިވަނީ ސިޔާސީ ކަންކަމުގައި އެމަނިކުފާނަށް އެންމެ ގާތް އަދި އެންމެ އެހީތެރިވެދެއްވި ބޭފުޅަކީ އަބްދުއްރަހީމް ކަމަށެވެ. އަދި އެއީ އެމަނިކުފާނު ވަރަށް ފަޚުރުވެރިވެވަޑައިގަންނަވާ ބޭފުޅެއްކަމަށް ވިދާޅުވި އެވެ. އަދި އެއީ ރައީސް ޔާމީނުގެ ވެރިކަމުގައި ވެސް އަދި ފަހުން ވެސް ސިޔާސީ ކަންކަމުގައި އެހީތެރިވެދެއްވީ އަބްދުއްރަހީމް ކަމަށް ވެސް ރައީސް މުއިއްޒު ވިދާޅުވި އެވެ.
ރައީސް ޔާމީން ވަނީ އެމަނިކުފާނާއި ރައީސް މުއިއްޒުއާއި ދެމެދު ގުޅުމެއް ނެތްކަމަށް ވިދާޅުވެ އެކަމާއި ގުޅޭގޮތުން ވާހަކަ ދައްކަވާފަ އެވެ.
އެމަނިކުފާނު ވިދާޅުވީ ރައީސް މުއިއްޒު ރައީސް ކަމަށް ހޮވިވަޑައިގެން މުއިއްޒުއަށް ގުޅުއްވި ކަމަށާއި ނަމަވެސް ފޯނަކަށް ޖަވާބެެއް ނުދެއްވާކަމަށެވެ. އަދި މިއަދާއި ހަމައަށް އެމަނިކުފާނުގެ އެއްވެސް މެސެޖަކަށް ޖަވާބު ދެއްވާފައި ނުވާކަމަށް ވިދާޅުވި އެވެ.
އެއަށް ޖަވާބު ނުދެއްވާތީ މުހައްމަދު ހުސައިން ޝަރީފު(މުންދު)އަށް އަޅުގަނޑު ގުޅިން. މުންދު ފޯނު ނެގި. މުންދު ވިދާޅުވި ހަމަ މިހާރު މިދަނީ ރައީސަށް ދަންނަވާށޭ ރައީސް އެބަހުންނެވިއޭ ޖަލްސާ ނިންމަވާފަ އަޅުގަނޑާ ސަލާން ކުރަން. މުންދު ރައީސަށް ދަންނަވާފަ ވަޑައިން ވިދާޅުވި ތިމަންނަ ރައީސަށް ދަންނަވައިފީމޭ. " ރައީސް ޔާމީން ވިދާޅުވި އެވެ.
ޔާމީން ވިދާޅުވީ އެމަނިކުފާނާއި ހަމައިން ރައީސް މުއިއްޒު އަތްޕުޅުގައި ހިއްޕަވަން އަތް ދިއްކޮށްލި ކަމަށާއި އެކަމާއި ރައީސް މުއިއްޒު ދެކޮޅުހައްދަވަންޖެހޭ ސަބަބެއް އެނގިނުލައްވާ ކަމަށެވެ. އެކަން އެނގިވަޑައިގަންނަވާނީ ރައީސް މުއިއްޒަށް ކަމަށް ވިދާޅުވި އެވެ.
މީޑިއާ ކުރިމަތީގައިސިޔާސީ ވެރިއަކު އެއްފަހަރު ދައްކަވާ ވާހަކައެއް ދެވަނަ ފަހަރު ތިންވަނަ ފަހަރު ހަތަރުވަނަ ފަހަރު ދެކޮޅު ނުޖެހޭ ގޮތަށް ދައްކަންޏާ އެއަށް ކިޔާނީ ދޮގުހެދުން ދެއްތޯ."ރައީސް ޔާމީން ވިދާޅުވި އެވެ.
ހައި ކޯޓުން މިއަދު ހުކުމް ކުރީ ޔާމީންގެ މައްޗަށް ކޮށްފައި އޮތް 11 އަހަރުގެ ޖަލު ހުކުމް ބާތިލް ކުރުމަށްފަހު އަލުން އެ މައްސަލަ ދަށު ކޯޓުން ބެލުމަށެވެ. އެ މައްސަލައިގައި ޔާމީންއާ ދެކޮޅަށް ހުށަހަޅާފައިވާ ހެކިތަކަށް ޖަވާބުދިނުމަށް އެކަށީގެންވާ ފުރުސަތެއް ދަށު ކޯޓުން ދީފައިނުވާ ކަމަށް މިއަދު ހައި ކޯޓުން ބުންޏެވެ.
ރިޝްވަތު ދިނުން އަދި މަނީލޯންޑަރިންގެ ކުށް ސާބިތުވާ ކަމަށް ކަނޑައަޅައި ޔާމީންގެ މައްޗަށް ކްރިމިނަލް ކޯޓުން 11 އަހަރުގެ ޖަލު ހުކުމެއް އިއްވީ ޑިސެމްބަރު 25، 2022، ގަ އެވެ. އެ މައްސަލަ އެމަނިކުފާނުގެ ފަރާތުން އިސްތިއުނާފު ކުރީ ޖޫން، 2023، ގަ އެވެ.
