ރައްޔިތުންގެ މަޖިލިހުގެ މަޑަވެލި ދާއިރާގެ ގޮނޑި ޕީއެންސީގެ ކެންޑިޑޭޓު މުހައްމަދު ޝަމީޒް ކާމިޔާބު ކުރައްވައިފިއެވެ.
އޭނާ މި ގޮނޑި ކާމިޔާބު ކުރެއްވީ އެމްޑީޕީގެ ކެންޑިޑޭޓު އިބްރާހިމް ނާފިޒް (ޗިކާ) ބަލި ކުރުމަށް ފަހުގައެވެ.
ވަގުތީ ނަތީޖާ ދައްކާގޮތުން ޝަމީޒަށް ލިބިވަޑައިގެންނެވީ 1111 ވޯޓެވެ. ޗިކާއަށް 654 ވޯޓު ލިބުނު އިރު އެދާއިރާއަށް ރައީސް ޔާމީންގެ ޕާޓީ ޕީއެންއެފްގެ ކެންޑިޑޭޓް އަހުމަދު މުހައްމަދު ވަހީދު (ވައްޑެ)އަށް ލިބުނީ 254 ވޯޓެވެ. ދެން އެދާއިރާއަށް ކުރިމަތިލި އުސައިދު ހުސައިނަށް 25 ވޯޓެވެ.
މި އިންތިހާބުގައި 284،663 މީހުންނަށް ވޯޓުލުމުގެ ހައްގު ލިބޭއިރު އިލެކްޝަންސް ކޮމިޝަން (އީސީ) އިން އެންމެފަހުން އާންމުކޮށްފައިވާ ތަފާސްހިސާބުތައް ދައްކާ ގޮތުން ހަވީރު 5:00 އާ ހަމައަށް ވޯޓުލީ 207،693 މީހުންނެވެ.
އެއީ ވޯޓުލުމުގެ ހައްގު ލިބިފައިވާ މީހުންގެ 72.96 ޕަސަންޓެވެ. މީގެ ތެރޭގައި ހިމެނެނީ 102،867 އަންހެނުންނާއި 104،826 ފިރިހެނުންނެވެ.
މި އިންތިހާބުގައި 93 ދާއިރާއަކަށް 368 ކެންޑިޑޭޓުން ވާދަކުރެއްވި އެވެ.
