މިއަދު ބޭއްވި ރައްޔިތުންގެ މަޖިލީހުގެ އިންތިހާބުގައި ސަރުކާރު ހިންގާ ޕީއެންސީ/ޕީޕީއެމް މަޖިލީހުގެ 71 ގޮނޑި ކާމިޔާބުކޮށް ސުޕަމެޖޯރިޓީ އެޕާޓީން ހޯދައިފި އެވެ.
މިއީ މި ފަހުގެ ތާރީހުގައި އެއް ޕާޓީއަކަށް މިހާ ގިނަ އަދަދެެއްގެ ގޮނޑި ލިބުނު ފުރަތަމަ ފަހަރެެވެ. މީގެ ކުރިން މަޖިލީހުގެ މެޖޯރިޓީ އޮތް އެމްޑީޕީއަށްވެސް ހޯދުނީ 65 ގޮނޑިއެވެ.
ގާނޫނުއަސާސީ އިސްލާހުކުރުމުގެ ބާރާ އެކު، 20 ވަނަ މަޖިލީހަށް އިންތިހާބު ކުރާ 93 މެމްބަރުންގެ ސުޕަ މެޖޯރިޓީ ނުވަތަ ހަތަރު ބައި ކުޅަ ތިން ބައި ހޯދަން ބޭނުން ވަނީ 70 ގޮނޑިއެވެ.
ވަގުތީ ނަތީޖާ ދައްކާ ގޮތުން ޕީއެންސީއަށް 71 ގޮނޑި ލިބުނުއިރު ދެން އެންމެ ގިނަ ގޮނޑި ލިބުނީ އިދިކޮޅު މައި ޕާޓީ އެމްޑީޕީއަށެވެ. ޕާޓީއަށް 12 ގޮނޑި ލިބުނުއިރު އަމިއްލަ ގޮތުން ވާދަކުރެއްވި ހަ މެންބަރުން ވަނީ ގޮނޑި ކަށަވަރުކޮށްފައެވެ. އަދި އެމްޑީއޭ އިން ދެ ގޮނޑި، ޖުމްހޫރީ ޕާޓީ އަދި އެމްއެންޕީއަށް ކަށަވަރުވީ އެއް ގޮނޑިއެވެ.
އެއީ މާމިގިލި ދާއިރާ ކާމިޔާބު ކުރެެއްވީ ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި މީދޫ ދާއިރާގެ ގޮނޑި ކާމިޔާބު ކުރެއްވި އަހުމަދު ސިޔާމް، ސަރުކާރު ކޯލިޝަންގައި ހިމެނޭ އެމްއެންޕީގެ ލީޑަރު ކާނަލް ނާޒިމް ހިމެނިވަަޑައިގަންނަވައެވެ.
ޕީއެންސީން ވަނީ ޖުމްހޫރީ ޕާޓީ އަދި އެމްޑީއޭ އާއެކު ކޯލިޝަން ހަދައިފައެވެ.
ވަގުތީ ނަތީޖާތައް ދައްކާގޮތުން އާބާދީ ބޮޑެތި ހުރިހާ ސިޓީއަކުން ޕީއެންސީން ވަނީ މެޖޯރިޓީ ހޯދާފައެވެ.
ވިހިވަނަ މަޖިލީހުގެ 93 ދާއިރާއަށް މެންބަރުން ހޮވަން މިއަދު ބޭއްވި އިންތިޚާބުގައި ދެ ލައްކައަށް ވުރެ ގިނަ މީހުން ވަނީ ވޯޓުލައިފައެވެ. ޖުމުލަ 90 ދާއިރާއަކަށް ޕީއެންސީގެ ކެންޑިޑޭޓުން ވާދަކުރިއިރު، އިދިކޮޅު އެމްޑީޕީން ވާދަކޮށްފައިވަނީ 89 ދާއިރާއަކަށެވެ. އަދި، އަމިއްލަ 130 ކެންޑިޑޭޓުންނާއި، ޖުމްހޫރީ ޕާޓީ (ޖޭޕީ)ގެ 10 ކެންޑިޑޭޓުންނާއި ދަ ޑިމޮކްރެޓްސްގެ 39 ކެންޑިޑޭޓުން އިންތިޚާބުގައި ވާދަކުރިއެވެ.
