އިންސާނާ އުފެދުނީން ސުރެ، ޝައިތާނާ އަކީ އޭނާގެ ދުޝްމަނެއް ކަމަށާއި، މުޖްތަމައުގައި އެންމެ ފަރުދަކު ވެސް މުންކަރާތަކަށް އަރައިގަންނަ ނަމަ، އޭގެ ނޭދެވޭ އަސަރު، މުޅި މުޖްތަމައުއަށް ފޯރާނެ ކަމަށް ހުކުރު ޚުތުބާގައި ބުނެފިއެވެ.
''ހެޔޮ ކަންކަމަށް އަމުރުކުރުމާއި މުންކަރާތް ނަހީކުރުން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނެފައިވަނީ
ޝައިތާނާގެ ބޮޑާކަމާއި، ކިބުރުވެރިކަމުގެ ސަބަބުން، މާތް ﷲ ގެ ރަހުމަތުން އޭނާ ދުރުކުރެއްވުނު ދުވަހުން ފެށިގެން، މީސްތަކުން މަގުފުރެއްދުމުގެ މަސައްކަތް ފަށާފައިވާކަމަށެވެ.
ޚުތުބާގައި ބުނީ މި އުއްމަތުގެ ތެރެއިން ބަޔަކު، ޝައިތާނާގެ ވަސްވާސްތަކަށް ހެއްލި، ﷲ ނަހީ ކުރައްވާފައިވާ ކަންތައްތައް ކުރަމުން ދާއިރު، އެއުރެން ހެޔޮ މަގަށް ގެނައުމަކީ ކޮންމެހެން ކުރަންޖެހޭ ކަމެއް ކަމަށެވެ. މާތް ﷲ ހަރާމް ކުރައްވާފައިވާ ކޮންމެ ކަމަކީ، މުންކަރާތެއްކަން ފާހަގަކޮށް ޚުތުބާގައި ބުނީ ﷲ އަށް އުރެދުމަކީ މުންކަރާތެއް ކަމަށާއި، ދީނުގެ ޝިއާރުތަކަށް މަލާމާތްކޮށް، ފުރައްސާރަ ކުރުމަކީ މުންކަރާތެއް ކަމަށެވެ. ޚުތުބާގައި ބުނީ އަމަން އަމާންކަން ނަގާލުމަކީ މުންކަރާތެއް ކަމަށާއި، ހައްގަކާނުލައި، މީހުންގެ މުދަލަށާއި، ފުރާނައަށާއި، އަބުރަށް އަރައިގަތުމަކީ ވެސް މުންކަރާތެއް ކަމަށެވެ. މީސްތަކުންގެ މެދުގައި މުންކަރާތްތައް އާންމުވެގެން ދިއުމުން ﷲ ތަޢާލާ ނަބީބޭކަލުންނާއި، ރަސޫލުބޭކަލުން ފޮނުއްވަވައި، އެބައިމީހުންނަށް އިންޒާރު ކުރައްވާފައިވާކަން ޚުތުބާގައި ފާހަގަކޮށްފައިވެ އެވެ.
މާތް الله ހަރާމް ކުރައްވާފައިވާ ކޮންމެ ކަމަކީ މުންކަރާތެއްކަން ފާހަގަކުރައްވައި ހުތުބާގައި ބުނީ, الله އަށް އުރެދުމާއި ދީނުގެ ޝިއާރުތަކަށް މަލާމާތްކޮށް, ފުރައްސާރަ ކުރުމާއި އަމަން އަމާންކަން ނަގާލުމާއި ހައްގަކާނުލައި މީހުންގެ މުދަލަށާއި ފުރާނައަށާއި އަބުރަށް އަރައިގަތުމަކީ މުންކަރާތެއް ކަމަށެވެ.
އަދި ނުބައި އެންމެހާ ކަންކަން މަނާކުރުމަކީ އިސްލާމް ދީނުގައި ކުރަން އަންގަވާފައިވާ ކަމެއް ކަމަށާއި މި އުއްމަތަކީ އެންމެ ހެޔޮ އުއްމަތް ކަމުގައި ވެފައި ވަނީ ހެޔޮ ކަންކަމަށް އަމުރުކުރުމާއި ނުބައި ކަންކަން ނަހީކުރާ ބަޔަކަށްވާތީ ކަމަށް ހުތުބާގައި ބުންޏެވެ.
ހުތުބާގައި ބުނީ, ހެޔޮ ކަންކަމަށް އަމުރު ކުރުމާއި ނުބައި ކަންކަން ނަހީ ކުރުމުގެ ފައިދާއަށް ބަލާއިރު އެއީ ކުށްފާފަތަކުން މީހާ ތާހިރު ކޮށްދޭ ކަމެއް ކަމަށެވެ. އަދި އެއީ އިންސާނާގެ އަތުގައި ހޭދަކުރާނެ ފައިސާއެއް ނެތަސް ކުރެވިދާނެ ސަދަގާތެއް ކަމަށާއި އަދި އެއީ الله ދެއްވި ނިއުމަތްތައް ބަލައިގަނެ, ޝުކުރުވެރިވާކަމުގެ އަލާމާތެއް ކަމަށް ބުންޏެވެ.
